IA-p naalakkersuisooqatigiit suleqataaneroqquaat
Harald Biancop Naaja Nathanielsenillu naalakkersuisooqatigiit suleqatigiinnissamut pimoorussillutik piumassuseqarsoraat, politikerillu taakku marluk aamma isumaqarput nipi anninneqartartoq qineqqusaarnermitullusooq ingerlanneqartuarsinnartoq. IA-kkormiut Siumup Atassutillu suleqataarusussuseqarnissaannik ujartuipput, amerlanerussuteqartullu alaajangiisartuunerat aamma nassuerutigalugu. Erseqqissaatigerusuunnarpaat naalakkersuisooqatigiit illuatungiliuttut pimoorullugit isummersuutigisartagaannik tusaaniarnerusuuppata tamanna Nunatsinnut iluaqutaaginnassasoq.
-Naalakkersuisutigoortuunngitsumik suliniaqatigiiffiit (NGO) innuttaasullu Naalakkersuisooqatiginnit allaanerusumik isumaqartut sumiginnarneqarput. Oktobarip 23-iani Nuummi “uran naamik” pillugu akerliussutsimik takutitsisoqarmat Naalakkersuisooqatigiinnit politikerimik ataatsimilluunniit sassartoqanngilaq akerliussutsimik takutitsisunut nassuiaasumik. Akunnerilli qassialuit qaangiummata Naalakkersuisooqatigiinni politikeriusut “angertut” peqatigalugit piffissaqaleriataarsimapput naneruartunut ingerlaaqataanissaminnut. Oqariartuutaat paatsuugassaanngilaq: “Uatsitut isumaqarassi ilissi pillusi atavugut, politikerit marluusut isumaqarput.
Nathanielsenip Biancollu aamma Partii Inuit naalakkersuisooqatigiinnit anisitaanerannut pissutaasup eqqumiitsuunera aamma erseqqissaatigaat, tassalu Randi Brobergip tarnimi nalunngissusaa malillugu uranimut akuersaanngilluinnarnerup atounnaarsinneqarnissaanut itigartitsinissanissaminik oqaaseeqarnera piinnarlugu anisitaallutik. Partiimmi tamanna qineqqusaarnermi isumagaa, Partii Inuilli siulittaasuata Nikku Olsenip naalakkersuisooqatigiinnut ilanngunniarnermi isuma taanna allanngortippaa.
-Politikerit Naalakkersuisooqatigiit isumaannit allaanerusumik isumaqartut appisaluunneqartarput. Partii Inuit ilaasortaatitaat Randi Broberg kingullertigut appisaluussaavoq kikkut tamarmik takusinaasaannik. Attueqqusinngilluinnarneq pillugu oqaaseqartartutut saqqummiimmat Aleqa Hammondip Doris Jakobsenillu appisaluuppaat akerliulluni taasiniarmat – tarnimi nalunngissusaa malillugu, Inatsisartunut ilaasortat marluk nassuiaapput.
