IA Nuuk: Angerlarsimaffeqanngitsut pitsaanerusumik sullinneqartariaqarput
NIA-p siulittaasua Therkel Huusum-Isaksen tamanna pissutigalugu, Kommuneqarfik Sermersuumi IA-p ilaasortaatitaanut ammasumik allagaqarpoq, Nuummi angerlarsimaffeqanngitsut atugaannut aaqqiissutissanik marlussunnik siunnersuuteqarluni.
NIA isumaqarpoq, Nuummi angerlarsimaffeqanngitsut 36-t inissianik anginngitsuni pingasuni pitsaanngilluinnartuni inissinneqartarnerat akuersaarneqarsinnaanngitsoq. Kommunalbestyrelsi kaammattorneqarneqarpoq ininik piukkunnarnerusunik nassaarniaqqullugu, "Naapiffillu" Børnehjemsvejimiittoq tamatumunnga piukkunarsinnaasoq siunnersuutigalugu. Tamatuma saniatigut kommunalbestyrelsimut kaammattuutigineqarpoq illoqarfimmi angerlarsimaffeqanngitsut inissaannik pitsaanerusunik nassaartoqarsinnaanersoq misissoqqullugu.
NIA-p siulittaasuata naggasiilluni allappoq, angerlarsimaffeqanngitsuunerup ukkatarineqarnera annertusarneqartariaqartoq, aammalu kommunalbestyrelsimi IA-p ilaasortaatitaata immikkoortortaqarfiup saaffiginnissutaanut qanoq qisuariaateqarnissaat qilanaarineqartoq. IA-p 2013-imi nuna tamakkerlugu ataatsimeersuarnerani angerlarsimaffeqanngitsuuneq pillugu ajornartorsiutit eqqartorneqarput, aamma nalunaarusiaq "Nuummi angerlarsimaffeqanngitsuuneq" ungasinngitsukkut saqqummersinneqarpoq.