IA: Naaggaarneq allanngunngilaq

-Inuit Ataqatigiinni nutaamik apeqqummi tassani isummertoqarnikuunngilaq. Inuit Ataqatigiit isummernissaminnik piareersaateqarput oqallinnissatsinnullu. Massakullu isummersimanerput qangali atuuppoq, allamik nutaamik isummertoqanissaa tikillugu, IA-p siulittaasua Kuupik Kleist oqarpoq.

Kuannersuarnilu uranimik piiaasoqalisappat, tamatuma avatangiisi peqqissuserlu eqqarsaatigalugit qanoq illersorneqarsinnaatigineqarnera pillugu Greenland Minerals & Energyp nalunaarusiaa takkutsinnagu oqallinneq aallartinneqassanngitsoq, Kuupik Kleist oqarpoq.

Nalunarusiaq taana ukkiup naalernerani piareersimassasoq naatsorsuutigineqarpoq.

Taavami urani illersorneqarsinaasumik piiarneqarsinnaasoq nalunaarusiami oqaatigineqarpa? Demokratitulli neriuppit, uranimut naagaarluinnarneq atorunnaarsinneqassasoq?

- Sioqqutsillunga isummernermik nutaamik nalunaaruteqarnianngilanga aamma pissusissamisuunngilaq. Partiip iluanni oqallisigissavarput allamik isummertoqassanersoq taavalu aamma naalakkersuisooqatigiit akornanni oqallittussaavugut. Tamanna naammassippat nutaamillu isummertoqassappat massakkumiit allaanerusumik, taava taanna nalunaarutigiumaarparput, Kuupik Kleist akivoq.

Uranimut naaggaarluinnarnermut Naalakkersuisoqatigiit siunissami qanoq isummissanersut, qinersisartunut qaqugu tusartinneqarumarnersut, partiip siulittaasuata akisinnaangilaa. Upperaali, qinigaaffiup aappaagu juunimi naannginerani isummertoqareersimassasoq.

Qanormi uranimik avammut tuniniaalernissamik isumaq nalorninartoqartitsigaajuk?

- Soorunami pingaaruteqartorujussuuvoq nunatsinni qinngornernik ulorianartunik akulinnik piiaasoqalerumaarnersoq siunissami aammalu taakkua aatsitassat nunarsuarmi tuniniarneqalerumaarnersut. Nunatta ilisimaneqarneranut pinngitsoorani tamanna sunniuteqassooq, Nunarput imatut ilisimaneqassanersoq qinngornernik ulorianartortalinnik piiaaffittut tuniniaaffittullu imaluunniit tamakkuninnga inerteqquteqartutut. Taamaattumik pingaaruteqarpoq soorunalimi, IA-p siulitatasuat aamma Naalakkersuisut siulittasuat Kuupik Kleist oqarpoq.

Kuupik Kleist aamma ilisimatitsivoq, uranimut naaggaarluinnarnermut IA-p qanoq inissisimanerat pillugu piffissami kingullermi aalassassimaarnerup malitsigisaanik, Danmarkimi naalakkersuisut saaffiginnissimasut, ilumut Nunatta uranimik piiaasinnaneq aammaassimaneraa paasiniarlugu.