Illuatungiliuttut kiffartuussinermi isumaqatigiissutitaat kamaatigaat: Nunatsinnut iluaqutaanngillat
Angallassinermi kiffartuussinermut isumaqatigiissutit 2021-imut siunissamullu tunngasut suli piffissaagallartillugu inissipput, kiffartuussinermulli isumaqatigiissutit nutaat hurraartuutissaanngillat.
Nunatsinni sumiiffinni amerlasuuni angallassinermut pitsanngoriartitsinerunngikkaluarlutik, Inuiaqatigiinnut akisoorujussuussapput.
AAMMA ATUARUK Angallassinermi kiffartuussinermut isumaqatigiissutit inissittut
Partii Naleqqamiit Pele Broberg taama isumaqarpoq. Naalakkersuisoqatigiit, Siumut, Demokraatit Nunattalu Qitornai siunnersuummut novembarip ulluisa arfernanni akuersisut, illuatungiliuttunit iluarineqanngilaq.
- Taamani ingerlatsinerit 2016-imi ajorineqaqisut ingerlateqqiinnaleramikkit.
- Naalakkersuisooqatigiit kujataani ukioq kaajallallugu immakkut angallassinissaq naammagittarfigeqquaat. Taanna uagut isumaqatiginngilarput, ineriartortitsinermut peqataatitsinerunngimmat, mittarfissualiortitseriarluni Nuummi Ilulissanilu, taamaleriarlunilu nunap sinnera imminnerlugu, innuttaasullu naammagittaqqullugit. Taamannak inissiineq uagut isumaqatinginngilarput.
Kiffartuussinissamut isumaqatigiissutit ukiut sisamat matuma siornatigut isumaqatigiissutaanikut. Massakkullu kiffartuussinissamut isumaqatigiissutinut sanilliussilluni Pele Broberg KNR-imut taama oqarpoq.
Naalakkersuisut Air Greenland, Disko Line, Nordlandair Arctic Umiaq Linelu isumaqatigiissuteqarfigaat - ingerlatseqatigiillu taakku ilaasartunik angallassisartooreerput.
Naalakkersuisut nalinginnaagaluartutut suliariumannittussarsiuusseqqarnatik isumaqatigiissusiorput, Inuit Ataqatigiit siulittaasuat Múte Bourup Egede aperigaanni, tamanna siunissami suliakkiisarnissami ileqquliunneqarsinnaasoq kusananngitsoq akivoq.
- Kisiannili neqoroortitsisoqarsimannginnera tunngavigalugu akitigut kiffartuussinikkullu ilumut neqoroorut pitsaanerpaaq pissarsiarisimanerlugu ilisimanngilarput, taanna KNR-imut taama oqarpoq.
Isumaqatigiissutit taamaatiinnariaavat
Paasissutissat
Kiffartuussinissamut isumaqatigiissutissat kujataani, Qeqertarsuup Tunuani, Uummannap Upernaviullu eqqaani, Nuummit Maniitsumut Ittoqqortoormiiniillu Nerlerit inaannut atuutissapput.
Kiffartuussinermut isumaqatigiissutit ukiut qulit ingerlaneranni Naalakkersuisunut 1,7 milliardit koruuninik aningaasartuutaassapput.
Air Greenland iluanaaruteqarnerpaassaaq. Namminersorlutik Oqartussat pigisaa, timmisartuussileqatigiiffk ukiut qulit ingerlanerani 1,4 milliardit koruuninnassaaq.
Disko Line 237,6 millionit koruuninngassaaq. Arctic Umiaq Line 77,2 millionit koruuninnassaaq. Nordlandairilu 25,4 millioninnassalluni.
Kiffartuussinermut isumaqatigiissutit ukiuni qulini atuutissapput. Isumaqatigiissuteqarnermi ”akit pitsaassuserlu eqqarsaatigalugit” kiffartuussinermut isumaqatigiissuteqarnerit ukiuni qulini atuuttussanngortinneqartut, Ineqarnermut attaveqaqatigiinnermullu naalakkersuisup Karl Frederik Danielsen (S) oqarpoq.
Taamatulli naliliineq Inuit Ataqatigiinniit isumaqatigineqanngilaq.
- Mianernarluinnartutut isumaqarpugut. Tassami aningaasat 2 milliardingajaviit ukiunut qulinut pitunneqarlutik uani suliarineqarput. Aaammalu suliariumannittussarsiuussisimannginnerup aallaavigisaani innuttaasunut angallanneq akitigut aammalu kiffartuusinikkut pitsaanerpaaq ilumut pissarsiarinerlugu ilisimanngilarput, Múte Bourup Egede oqarpoq.
Partii Naleqqap inuiaqatigiinniit isumaqatigiissutit pillugit naammagittaalliortoqarnissaa utaqqimaarpaat. Naammangisimaarinninngittoqarpallu Partii isumaqatigiissutinik taamaatitsinissamik piareeqqapput.
- Pissaanermik allannguisoqassangaluarpat, naalakkersuisooqatigiinnik tulliani nikisitsisoqassagaluarpat, uagut atorunnaarsinnissaa sulissutigissavarput. Pele Broberg naqissusiivoq.
