IA inatsimmut nukingiussamut: Angerlarsimaffiup innarlitsaaliugaanera qulakkeertariaqarparput
Inuit angerlarsimaffiinut eqqartuussisumit akuersissuteqaqqaarani isersinnaaneq inatsisillu atuuffissaata sivisussusaa pineqartut Inuit Ataqatigiit siulittaasuat Múte B. Egede oqarpoq.
Naalakkersuisut inatsisissatut siunnersuut sukateriffiusussaq atuutilernissaa sulissutigaat.
Ulorianaateqartumik nappaammik siaruatsaaliinermik, soorlu coronavirusimik, inatsisissatut siunnersuut siuneqartaqarpoq.
Inatsisissatut siunnersuut maannakkutut isikkoqartillugu, politiit eqqartuussivimmit akuersissummik peqaratik angerlarsimavimmut isersinnaanngussapput.
AAMMA ATUARUK Inatsit nukingiussaq: Politiit angerlarsimaffinnut akuersissuteqaratik isersinnaalissapput
Inuit Ataqatigiillu inatsisissatut siunnersuut akuersissutigissappassuk taanna allannguiffigineqaqqaartariaqarpoq.
- Angerlarsimaffiup innarlitsaaliugaannginnissaanik tunngaviusumimmi inatsimmi pisinnaatitaaffeqarnitta qulakkeernissaa siunertaralugu suliaqartussaanerput uagut ersarissarniarparput.
- Aamma tusaasinnaagatsigu Naalakkersuisut tassunga kalluaasumik siunertaqanngitsut. Taamaammat taassuma paaseqatigiiffiunissaa qularinngilarput, Múte B. Egede oqarpoq.
IA: Inatsit sivikinnermik atuuttariaqarpoq
Inatsit akuersissutigineqassappat piffissami aaliangersimasumi taamaallaat atuutissasoq Inatsisissatut siunnersuummi atuarneqarsinnaavoq.
Piffissaliussarli sivisuallaartoq Inuit Ataqatigiit isumaqarput.
- Piffissaliunneqartut massakkut sivisussusaa, tassa decembarip 31-at 2021-p tungaanut naalakkersuisut inatsimmik allanngueqqinnissamut piffissaliisimanerat, taanna utaqqeqqaanngikkaluarlugu siusinnerusukkut aaqqiisinnaanermik ujartueqatigiissinnaaneq ujartussagipput maannangaaq oqaatigisinnaavara.
AAMMA ATUARUK Olsvig om politikernes hastelov: Tænk jer godt om
Taamaammat piffissaliussap eqaannerunissaa IA-mit sulissutigineqarniarpoq.
- Inatsisit ukua atuuttuaannartussatut isigineqartussaanngimmata, piffissamilu massakkut imaannanngitsumi nalaatatsinni sukaterigallartariaqarnermik tunngaveqarmata taamaammat oqaloqataassuugut inuit peqqissusaat qitiutillugu.
Inatsilli sukaterneqartariaqartoq siulittaasup oqaatigaa.
- Malinnikkumasoqannginnera tunngavigalugu inatsisinik massakkut sukaterisariaqalerneq pisariaqarmat Inuit Ataqatigiinninngaanniit oqaloqataaffigissavarput, Inuit Ataqatigiit siulittaasuat Múte B. Egede oqarpoq.
Naalakkersuisut inatsisissatut siunnersuutaat Inatsisartut pingasunngorpat oqallisigissavaat.