IA: Ataataasut meerartaarnermi sulinngiffeqarsinnaanerat sivitsorli

Ataataasup meerartaarnermi meeravissiartaarnermilu sulinngiffeqarsinnaanera sapaatip akunnerinut arfinilinnut sivitsorneqassasoq, Inuit Ataqatigiit politikkikkut oqaaseqartartorigallagaata, Aqqaluaq B. Egedep maanna siunnersuutigaa.
Allattoq Elisa Isaksen
marsip 08-at 2010 05:37

Ataataasoq meeqqap inunngornerata kingornagut sapaatip akunnerini pingasuni ullumikkut sulinngiffeqarsinnaavoq, arnallu erninertik sapaatip akunnerinik marlunnik sioqqullugu, ernereernerminnilu sapaatip akunnerini 15-ini, sulinngiffeqartarlutik.

- Meerartaarnermi nukittuumik ilaqutariittut aallartinnissaq meeqqap peroriartorneranut aalajangiisuuvoq, Aqqaluaq B. Egedelu isumaqarpoq, meeqqap inuunerani sapaatip akunnerini siullerni ataataasup peqataanerunissaanut maanna piffissanngornerarpaa.

Naak angajoqqaat sulinngiffeqartarnerat eqaatsumik aaqqiivigissallugu periarfissaqaraluartoq, amerlanerpassuartigut anaanaasoq tassaasarpoq sivisunerpaamik sulinngiffeqartartoq. Tamannali Inuit Ataqatigiit allanngortikkusuppaat.

- Naligiissitaaneq inuiaqatigiit tamarmiusut akisussaaffigivaat, inuit ataasiakkaat kisimik akisussaaffiginngilkaat, siunnersuuteqartoq oqarpoq.

Sulinngiffeqarfiusinnaasup sivitsorneratigut ataataasoq meerartaarnermi meeqqamillu paaqqutaqarnermi peqataatinneqarnerulernissaanik periarfissiissaaq, taamatuttaaq qitornartaarnermi ilaqutariittut tunngaviusumik nukittuumik aallartilluarnissamut aqqutissiuissasoq, Aqqaluaq B. Egede isumaqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq