Højskolit matuneqariaannaapput

Nunatsinni højskolini marlunni - tassa Sulisartut Højskolianni Qaqortumiittumi, Knud Rasmussenillu Højskoliani Sisimiuniittumi - efterskolertitsisoqartalernissaanik politikkikkut kajumissaarillutik, Kommune Kujallermi borgmesteri, Jørgen Wæver Johansen, SIK-llu siulittaasua, Jess G. Berthelsen, ataatsimoorlutik tusagassiutinut nalunaarutiminni allapput.

Nunatsinni højskolit marluusut tapiiffigineqartarneri allanngortinneqanngippata taakku matuneqariaannaasut, borgmesterip SIK-llu siulittaasuata erseqqissaatigaat.

Inatsisartut ataatsimiinnerisa nalaanni Tasiilami efterskoliliortoqarnissaanik Inuit Ataqatigiit siunersuutaat, aamma Tasiilami efterskoliliortoqarani Upernavimmi efterskoliliortoqarnissaanik Atassutip Siumullu siunnersuutigisaat, Wæver Johansenip aamma Jess G. Berthelsenip nalunaaruteqarnerminni tunngavilesuutigaat.

Efterskoleliornissamik eqqarsaat taamaatiinnarneqartariaqartoq, borgmesterip SIK-llu siulittaasuata maanna siunnersuutigaat, oqarlutik periarfissat pioreersut atorluarneqarnissaat politikerinit qulakkeerniartariaqaraluarmat, tassami Sulisartut Højskolianni atugarsornissanut periarfissat pioreermata.

Sulisartut Højskoliata Qaqortumiittup iluarsartuunneqarnissaa nutarsarneqarnissaalu maanna pilersaarutaapput. Tamanna aningaasaateqarfinnit aningaasalersorneqartussaassasoq qularutigineqanngilaq, taamaalilluni tassani efterskolertoqartarnissaa periarfissaalersinnaalluarluni. Taamaattoqassappallu Namminersorlutik Oqartussat aamma aningaasaliisariaqarnissaat pisariaqassalluni.

Efterskoliliortoqarnissaanik siunnersuutit Inatsisartuni aappassaaneerlugu oqaluuserineqarnissaa juunip ulluisa tallimaanni pissasoq pilersaarutaavoq.