Højskolinut tapiissutit peerneqarmata kajuminnarunnaartoq
-Qallunaatut piginnaasakka killeqarmata artorsalerlunga HTX-mit decemberi qaammat aniinnarpunga, qallunaatut pikkorissaqqaarniarlunga!
Qallunaatut piginnaasakka annikigigakkit taavalu atuarneq qallunaatuinnaq ingerlalluni taamaattumik takorlooqqaaraluarpara højskoleqarniarlunga imaluunniit Danmarkimi sprogskolerlunga kisianni tusarpara periarfissaq taanna unitsinneqartoq tamannalu nikallujallannarpoq, Oline Kristensen 17-inik ukiulik oqarpoq.
Niels Arkalo Street Kommuneqarfik Sermersuumi HR-Konsulentitut atorfilik EVU-mi ilinniakkaminik naamassinninnini sproghøjskolersimanngikkaluaruni angusimasinnaassanerlugu ilimaginngilaa.
- Immaqa tamanna qularnarpoq, pissutigalugu ilinniarninni oqaatsit qallunaatuinnaq atorneqarnikuugamik taavalu qallunaatut sapiinnerulernikuuvunga højskolereernerma kingorna taamaalillunga ilinniagara naammassillugu.
Niels Street isumaqarpoq nunatta avataani højskolersinnaanissaq nunarsuarmioqataanitsinnut ilaatillugu inuusuttut piginnaatitaaffigisariaqaraat.
-Uggornarpoq naalakkersuisut tapiissutit peermatigit uanga isumaqartuaannarama sumiluunniit ilinniarneq imaluunniit atuarneq nunarsuarmi sumiluunniit pingaaruteqartoq apeqqutaatinnagu maani Kalaallit Nunatsinni ilinniagarput ingerlassinnaagaluarutsiguluunniit nunarsuarmiut pissusaat ilinniarfigsariaqaratsigit.
Ilinniartitaanermut naalakkersuisoqarfimmit oqaaseqartinniaraluaratta iluatsinngitsoorparput.