Højskolernissamut tapiissutit atorunnaarnerat aalajangiusimavaat

- Uggornaraluarpoq, Danmarkimi højskolernermut tapiissutit peerallaratsigit. Kisianni aningaasatigut periarfissaqalerpat, periarfissaq taanna eqqartoqqinneqarsinnaavoq. Højskolit oqaatsitigut, ilinnniarnikkut inuttullu ineriartorfittut atorneqartarput, nuannaarutigaarali, Nunatsinni højskolit annerusumik atorneqalissammata, Mimi Karlsen oqarpoq.

Tassalu højskolini atuarnissamut aningaasaliissutit amerlassusaat nikinngillat, Danmarkimi højskolertussanut aningaasaliissutit peerlugit, nunatsinni højskolertussanut atorneqassammata. Kisianni tassa Danmarkimi Højskolernermut tapiissutaasartut sipaarniarnermit eqqorneqarput.

Ukiumut 400-it Danmarkimi højskolerusullutik qinnuteqartarput. MIPI-miillu oqatigineqarpoq, naak uppernarsaatissaqanngikkaluartoq takunerqarsinnaasoq, Danmarkimi højskolersimasut qallunaatut oqallorinnerulersimasartut, ilinniarfiillu amerlanerit qallunaatut oqalussinnaanermik piumasaqarfiummata, højskolersimaneq ilinnialernissamik aammaassisartoq.

- Soorunami uggornartorujussuuvoq, periarfissamik taamaattumik atorunnaarsitsigallarneq. Kisianni neriuppunga periarfissat allat atorneqartassasut, tassami ilinniarsimasunik amerlisaanermi periarfissat allat aamma amerlisarneqarput. Assersuutigalugu Piareersarfiit inuusuttunut ilinnialersimanngitsunut periarfissarsiuussisussaapput, ilinniartitaanermut naalakkersuisoq oqarpoq.

Nunatsinni højskolit ilinnialernissamut piukkussarnermut annerusumik atorneqarsinnaanerat siunertaralugu naalakkersuisoqarfimmi maanna misissuisoqarpoq.