Hvidbjørnen kunngikkormiunit pulaarneqarpoq
Sorsuummi Hvidbjørnen-imi inuttat ippassaani aatsaat paasitinneqarsimapput, angallat kunngikkunnit pulaarneqassasoq.
- Ulapeqaagut, tassami angallat qanoq saligaatigisoq kunngikkunnut takutikkusukkatsigu. Kunngikkut isernissaata tungaanut, ullaaq naallugu sorsuutip ilua asanneqarpoq. Oqarsinnaanngilanga, nalinginnaasumik angallat saligaatsuunngitsoq, kisiannili tassa ataqqinartorsuarnik pulaartoqaleratta, nalinginnarmiit asaasoqarneruvoq, sakkutuut umiarsuaata naalagaata tullia Morten Thielsen oqarpoq.
Sorsuut Hvidbjørnen nalinginnaasumik Kalaallit Nunaanni annaasiniarnernut, misissuinernullu atorneqartarpoq. Kunngikkulli nunatsinniinneranni Dannebrogimi angalaneranni paarsisuupput. Sorsuummi ilaapput, tusagassiortut Kunngikkullu angalaqataat.
- Kunngikkut sorsuutitsinnut pulaarnerat nuannaarutigeqaarput, soorlumimi kunngikkut uatsinnut qujaniartut, oqarniartullu suliagut ajunngitsumik suliarisimagivut. Kunngikkut annertuumik sullippavut, qujaniarnerat uatsinnut isumaqaqaaq nuannerlunilu, umiarsuup naalagaata tullia nassuiaavoq.
Sorsuummi Hvidbjørnen-imi inuttat, naalakkerneqarput uniformitik kusanartut atussagaat. Tamannalu aamma ukiuni 100-ikkaani, ileqquuvoq. Naak kunngikkut pulaarnerat akunnermik ataatsimik sivisussuseqaannaraluartoq, pulaarnissamullu annertuumik piareersaasoqarsimasoq, sakkutuut pulaarneqarnertik nuannareqaat.
- Isumaqarpunga kunngikkut pulaarnerat ajunngilluinnartumik ingerlasoq, aamma angallammi innuttaasut uattulli isumaqarpasipput. Kunngikkunnik pulaartoqarneq, inuunermi ataasiaannaq misigisassaagunarpoq, tamannalu angerlaruma kammalaatinnut ilaquttannullu oqaluttuarissavara, Morten Thielsen naggasiivoq.
Taassuma inuttaqataasa ilaat ataaseq isumaqataavoq. 19-inik ukiulik Anders Thomsen sakkutuut umiarsiaanni appasinnerpaami inissimavoq. Allatullli pisuussaagami sakkutuujuvoq, Kunngikkulli alakkaalermata immikkuullarissumik suliassinneqarpoq. Umiarsuup qaani sakkutuut sanileriiaarlutik qeqarlutik tikilluaqqusilermata ilaavoq. Taamaaliortarnerlu Anders Thomsenip tusareerasimagaluarpaa.
- Kisianni Dronninngikkut saavaniilluni allaalaarpoq. Kusanartumik qeqarnerluni, atisat ajunngitsumik atornerlugit apeqqutillu allarpassuit niaqqunni kaaviiaarput, Anders Thomsen oqarpoq.
Pulaarnerami qanoq ingerlava?
- Ilimagisannit ajunnginneroqaaq. Tulluusimaaqaanga. Kusanaqisugut, kingornatigut oqaluttuupaatigut, Anders Thomsen naggasiivoq.
