Mittarfik nutaaq: Hurtigruten Nuummi talittarfeqarusuppoq
Namminersorlutik Oqartussat ingerlatsitseqatigiiffiat Kalaallit Airports Nuummi annerusumik mittarfiliorpat, takornariartaatileqatigiiffiup Hurtigrutenip suliaminut millionilikkaanik aningaasaliinissaminut piareersimanini nalunaarutigaa.
- Aningaasaliisussaqalerpat, suliniut aallartinneqarpat naammassinissaalu ullulerneqarpat, uagut suliagut nangissinnaavagut, Hurtigrutenimi pisortaaneq, Daniel Skjeldam, Sermitsiaq.AG-mut oqarpoq.
Umiarsuaatileqatigiiffik takornariartaat "Fram" atorlugu Nunatsinni angallassisarpoq. Taanna 14-inik takornariartaataateqareerpoq, sisamanillu ilaneqarnissaat taakkua kissaatigaat, taakkunannga marluk Nunatsinniit Canadamut angallassisartussat.
- Nuuk tulaffigisassallugu orniginartuutipparput, illoqarfimmi qitiusumi inissisimavoq umiarsualivillu ukioq naallugu sikuneq ajormat, Daniel Skjeldam Sermitsiaq.AG-mut oqarpoq.
