HTX-imi persuarsiornartumik allagartartaartut

HTX-imi inspektøri Poul V. Jensen ilinniarnertuunut ima oqarpoq:”Sanaartornermik Ilinniarfimmi ullut nalinginnaasut itisuuliorfiusarput, annertuumik piumaffiginnittuupput, angorusutat, siunnerfigisat, inunnik amerlasuunik piumasaqaatit ataqatigiissaarneqartussaallutik.” imalu nangilluni: ” Nalunngilara maani najuuttut amerlasuut assut tanngassimaarutigigaasi, sulilu ilissinnut naatsersuuteqartut. Neriuutigaara ilinniarnersi tunuliaqutigalugu inuiaqatigiit sunneeqataaffigilluarumaarisi.”

NunaFonden sinnerlugu Steffen Petrussen agguaqatigiisillugu karakterilinnut legatinik agguaassivoq aammattaarlu nuannaartunartumik takkuttarnermut usornartumillu suliassianik piffissaq eqqorlugu tunniussisarnermut ajunngitsorsiaqartussatut akissarsitinneqarpoq.

Steffen ima oqarpoq: Aningaasaateqarfiup suliniutaasa ilagaat meeqqat inuusuttullu nuannaartorisaqarnissaat. Qummummi isigisassaqarluni allanut nanertuutaanngitsumik annertunerulaamik qanoq iliuuseqarnissaq ajornannginnerummat, nuannaartorisanut imminut naleqqiulluni uuttualaarsinnaaneq aammalu nammineq sumut killissimanermut assersuussisoqarsinnaaniassammat. Timersornerup, qaffasissumik pinartumillu timersornerup, piorsarsimassuseqarnerup, ilinniagarfinni maligassiuinerup silarsuaanni Nunatta ilorrup tungaanut ingerlanera nunarsuiarmiuni akornitsinnilu takuneqarsinnaaniassammat.

Ukioq mannalu karakteeriginnerpaatut aammalu takkuttuarnermigut suliakkiussanillu tunniussiuarnermigut akissarsitinneqarpoq Avaruna Mathæussen Ilulissaniit 11,2–mik taamaalillunilu 10.000,00 kr. akissarsitinneqarluni. Stephanie Wong Sisimiuniit 9,9 karakteereqarluni 5.000,00 kr.-nik akissarsitinneqarpoq aammalu Mia Chemnitz Sisimiuniit 9,7-nik karakteereqarluni 3.000,00 kr.-nik aningaasartalinnik tunineqarluni. 

Atuarfiuttaaq ilinniartitsisuisa kaammattuutinik akissarsitippaat Jakobine Lennert aammalu Ole Olsvig ilaatigut oqaatsinik makkuninnga.”Pineqartoq inuuvoq sulilluarniartartoq, takutippaa ilinniarneq aamma meeraqaraluarluni artornartunilu naalataqartaraluarluni naammassineqar-sinnaasoq.”  Ole Olsvig nunaqarfinnguamiit aggertuusoq ima oqaasertaqarpoq: ”Pineqartoq taasinnaavarput nuannersumik kinguneqarluartumik nasartaartoq. Pineqartup takutippaa angerlarserneq akiorneqarsinnaasoq qiimagaanni sukataaraannilu.”