Hotel Hans Egede 75 mio. koruunit nalinginut nutarterneqartoq
Akunnittarfiup iniutaanik atortorissaarutaanillu ukiuni marlunni annertuumik nutarteralunilu allilerisoqareersoq, Kalaallit Nunaanni akunnittarfiit ataatsimeersuartarfiutigisut nutaaliaanersaat pigineqalerpoq. Hotel Hans Egede tusagassiorfinnut nalunaaruteqarluni taama allappoq.
Pikkorissartarfiutigaluni ataatsimeersuartarfik sorpassuarnik atortulersugaavoq, ataatsimiinnermut ataatsimeersuarnermullu atortorissaarutit nutaaliaanerpaat pigineqarlutik. Ataatsimiinnernut, pikkorissarnernut ataatsimeersuarnernullu avatangiisit pitsaalluinnartut aammalu kiffartuussinerup qaffasissuuta annertusineqarnissaanik anguniagaqarneq naammassineqarsimavoq.
Atortortorissaarutit nutaarpassuit
Hotel Hans Egedep annertuumik nutarteriffigineqarneranut atatillugu, init 156-iusut tamaasa nutarterneqarput akunnittarfiullu kiffartuussinerata qaffasissussaa aamma annertusarneqarluni. Ilaatigut aamma timigissartarfik nutaaq atortorissaarluartoq, tangiartuisarfik internettimullu attaveqaatit sukkalluinnartut pigineqalerput.
AAMMA ATUARUK Hotel Hans Egede allileqqissaaq
Hotel Hans Egedep nunatsinni akunnittarfinni siullersaalluni init toqqarneqarsinnaasut ilaasa akiinut ilanngullugu internettimik killeqanngitsumik atuinissamik neqerooruteqarpoq. Inimi businessimi ineqaraanni imaluunniit akunnittarfiup inissiaataata ilaani, taava ulloq unnuarlu killeqanngitsumik internettertoqarsinnaavoq.
Arlaleriarlugu allanngortiterneqarsimavoq
Hotel Hans Egede immikkoortuni sisamani sanaartorneqarpoq. Siullermik 1987-imi, tulliani 1990-imi pingajussaanillu 2008-mi. Allilerinermillu nutarterinermillu suliniut kingulleq 2013-imi aallartinneqarpoq, akunnittarfiup saava nutaanngortinneqarluni, init annertuumik nutarterneqarlutik pikkorissartarfillu ataatsimeersuartarfiutigisoq 1.600 m2-nik annertutigisoq tallimanik ullorialerneqarsimasoq atorneqalerluni.