Hotel Hans Egede allileqqissaaq
Piginnittut suleqatigiinnerat 1976-mi aallartippoq Helge Tang aamma Carl Juhl siullerpaamik suleqatigiilermata. Sisimiuni Maniitsumilu akunnittarfiit neriniartarfiillu pigilerpaat kingornalu Nunatsinni akunnittarfiit anginersaat Hotel Hans Egede pigilerpaat. Nunatsinni ingerlatat sanatigut suleqatigiit taakku Horsenimi Vejlemilu 1980-ikkunni annertuumik ingerlataqarsimapput.
- Maanni illoqarfimmi annikitsunnguamik aallartippugut ukiullu ingerlaneranni akunnittarfik allisarsimavarput. Maanna ineeqqat unnuisarfiit 20-nik ilanissaat ataatsimeersuartarfimmillu suli ataatsimik sananissarput suliaraarput. Annertuumik eqqarsarnissaq avaqqussinnaanngilarput. Sullitavut annermik tassaapput inuussutissarsiornermik ingerlatallit. Taakku saniatigut akunnittarfimmi maani arlalinni neriniartarfeqarpoq inillu nutaat piareerpata inuussutissarsiortunut neqeroorutit Kalaallit Nunaanni annertunersaasut piariissapput, Helge Tang Jyllandimi inuusuttuugallarami igasuusoq oqaluttuarpoq.
Piginnittut tamarmik 60-it sinnerlugit ukioqaraluarlutik suli aallarnisaanermik anersaaqarput. Juhl og Tang imaasiarsaaleraluarlutik suli suleqatigiilluaqaat.
- Isumaqatigiissimavugut sapertut inaat qangiinnariarlugu saarnguffissatsinnut piniarluta. Ulluinnarni ingerlatagut nuannareqaagut tatigeqatigiilluarlutalu. Taamaammat arlarput aallarallarsinnaasarpoq ilisimalluarlugu suleqatip manna isumagilluaraa, Carl Juhl qalipaasutut ilinniarsimasuusoq oqarpoq.
Hotel Hans Egedep allilernissaanut 40 millioner koruunit atortussaagaluarlugit suli allanik pilersaaruteqarput. Nuussuarmi niuertarfeqarfissaq ilusinikkiartorpoq ilimananngilarlu tamanna Juhlip aamma Tang-ip suliaasa kingullersarissagaat.
- Kalaallit Nunaannit pissarsiarpassuaqarpugut misigisimavugullu tunniussaqartariaqarluta. Tamanna pilersaarutit annertuut tulliannik malitseqarpoq. Iluatsilluassappat aningaasaliisut allat suleqatigalugit naluttarfiup eqqaani pisiniarfeqarfissaq suliarissavarput. Taanna 6.000 kvadratmeteriussaaq. Taava tulliullugu suliarissavarput inissianik sanaartornissaa suliarlu naammassiguni 25.ooo kvadratmeterinik annertussuseqalerumaarpoq, Helge Tang Hotel Hans Egedemi quleriit sisamaanni allaffimmini titartakkat qimerloorlugit oqarpoq.
Helge Tang aamma Carl Juhl iluatsittunik suliaqartaraluarlutik aamma iluatsinngitsunik misiliisarsimapput
- Ukiut 100-likkaat kingulliit naalerneranni atlantikup avannaani aningaasarsiorneq unikaallappoq taamanikkullu Hans Egede Nykreditimut 1 krone-liinnarlugu tunisariaqarsimavarput. Tamanna inuuninni suliama annersarimmasuk qamuuna assut annernarsimavoq. Taamaammat nuannaarutisimaqaara akunnittarfik 2003-mi pigileqqikkatsigu ullumikkullu Hotel Hans Egede tulluusimaarutigeqaarput, Carl Juhl oqarpoq.
