Hong kongimi tamat oqartussaaqataanerannik tapersersuisut tigusaasut

Hong kongimi tamat oqartussaaqataanerannik tapersersuisuni 53-init ikinnerunngitsut sillimaniarnermut inatsisip isorineqaqisup atuutilerneraniilli pilersaarusiorluakkamik iliuuseqartoqarnerani Kinami oqartussanit tigusaapiloorput.

Beijingimi oqartussat Hong kongimi Tuluit Nunaannit nunasiaasimasumi tamat oqartussaaqataanerannik tapersersuisut akerliussutsimik takutitsiunnaarsinniarsarinerini 1000-nit ikinnerunngitsunik politeqarpoq.

Akerliusut akerliujuarsinnarlutillu politikki tunngavigalugu tigusaasimasut piaartumik iperagaanissaat piumasaraat.

Tamat oqartussaaqataanerannik tapersersuisut oqaaseqartartuisa Kinami aqutsisut kommunistiusut tigusarinninnerat kanngunartuliornertut taavaat. Taakkua Kinami aqutsisut taamaaliornerat Hong kongimi qinersinermi taasisinnaatitaanermik naqisimanninnertut taavaat.

AAMMA ATUARUK Hongkongip naalakkersuisuisa inatsisissatut siunnersuut assortuussutaasoq piaartumik atuutilersikkusukkaat

Tigusarinninnerit USA-mi naalakkersuisunngortussanit assuarineqarput. Tamanna USA-mi præsidentinngortussamit, Joe Bidenimit, nunanut allanut tunngasuni ministerinngortussatut piukkunneqartup, Antony Blinkenip, Twitteriani erserpoq.

- Inuppassuarnik tigusarinnineq, tamat oqartussaaqataanerannik tapersersuisunut tassa pisinnaatitaaffinnik nunani tamalaani atuuttunik qunusuillutik illersuinut, saassusineruvoq, Blinken Twitterimi allappoq.

Tamat oqartussaaqataanerannik tapersersuisut USA-mi naalakkersuisunngortussanit tapersersorneqarumaartut, taassuma ilanngullugu oqaatigaa.