Taamaatiinnarneqartoq Homo Sapienne Paamiuni isiginnaartitsissutigineqassanngilaq
Nunatta Isiginnaartitsisarfia Paamiunut apuussinnaasimanngilaq, isiginnaartitsinissarlu taamaatiinnarneqartariaqalerluni:
- Tamatigut uggornartuaannarpoq isiginnaartitsinissamik taamaatitsineq, silali kisimi naalagaavoq. Oqaatigereersinnaavarpullu isiginnaagassiaq Homo sapienne aappaagu nappaqqinniarlugu, ukioq mannalu tikinngisagut isiginnaartitsiffigiartorniarpagut avannaa kangialu angalaffiginissaanni, Manasse Berthelsen, isiginnaagassiornermi aqutsisoq oqarpoq.
AAMMA ATUARUK Homo Sapienne isiginnaartitsissutigineqalersoq
Ilulissani pujorpallaarnera pissutaalluni Nunatta Isiginnaartitsisarfia Ilulissanut kingusinaarluni tikippoq, timmisartoq Paamiunukartussaq inortorneqarluni.
Isiginnaartitsisartut maanna Nuuummiipput, angallammillu Maniitsumut aqagu tallimanngornermi ingerlaqqissallutik. Isiginnaartitsissusiaq Homo Sapienne, atuarfiup aulani arfininngorpat sapaatiuppallu takutinneqassaaq.
Isiginnaartitsisartut kingorna taava Sisimiunukassapput, Homo Sapiennelu tassani takutinneqassalluni.