Hollywood: Makka piumavaat
Hollywoodimi filmilianut inuttassarsiuisartup Rachel Tennerip ”The Secret Life of Walter Mitty” –mi inuttarsarsiunnerani Nuummi Københavnimilu misilitsitsisoqarmat paasinarsivoq kalaallit amerlasuut tusaamasanngorusuttut. Arnat angutillu filmiliaritikkusullutik misilitsittut amerlapput.
Islandimi aappassaanneerluni julimi misilitsitseqqinnermi kalaallit sisamat immikkut toqqarneqarsimallutik qaaqquneqarput. Filmimik sanannittoq isiginnaartitsisartoq Ben Stiller misilitseqqinnermi ilaavoq. Tusaamasamillu naapitsisut ilagaat Makka Kleist.
- Inussiarnersorujussuuvoq, soorlu ajukkuusaalaartunnguaq, taama Makka Kleist tusaamasap naapissimanera eqqaagamiuk oqarpoq.
Inuttassarsiukkat ilaat tassaavoq arnaq kalaaleq allakkerivimmi sulisuusaartussaq. Inuttassarsiugarli taanna manuskriftip allanngortinneqarnerani peerneqarpoq. Ilitsersuisulli tusaamasap Ben Stillerip Makka Kleistip misilitsinnerani pikkugisimagamiuk neqeroorfigaa filmimi inuttaaffigineqartussaq alla pisinnaagaa.
- Bartenderiusaartussaavunga ilimagaaralu tassani aamma oqalutsinneqarumaarlunga. Naatsortuutigaara qanittumi manus tigujumaarlugu, taama isiginnaartitsisartoq aamma Nunatta Isiginnaartitsinermut Ilinniarfiata pisortaa Makka Kleist oqarpoq.
Ilitsersuisoq isiginnaartitsisartorlu Ben Stiller filmiliassaminut inuttassarsiuilerami kalaallinik marlunnik oqaaseqarlutik isiginnaartitseqataasussanik pissarsiorpoq. Saniatigullu kalaallit imerniartarfimmi oqaaseqaratik inuttaaqataasussat 15-it missaaniittut ujartorsimavai. Pilersaarutit malillugit Islandimi taakkua immiunneqarumaartut.
Ulapaarneq nalornisitsisoq
Filmi ”The Secret Life of Walter Mitty” immiunneqalereerpoq, kisianni massakkumut manuskrifti suli allanngortinneqallattaaavoq.Taamaattumik Makkap nalugallarpaa filmimi qanoq oqaaseqartinneqassanerluni.
Isiginnaartitsisartutut sulinermi saniatigut Makka Kleist Nunatta Isiginnaartitsinermut Ilinniarfiata pisortaatut sulilluni assut ulapippoq, taamaattumillu filmimi ilaassaguni pisariaqartippaa paaseqqissaassallugu qaqugorpiaq immiunneqassanerluni qaqugulu angerlamut uteqqissinnaassanerluni. Ilinniartitaami aatsaat septembarip pingajuanni ilinniarlutik aallartipput.
- Suli eqqarsaatigigakku piffissaq taanna ajunnginnersoq qulakkeeriarlugu akissuteqarfigissavakka. Ilaatikkusuttorujussuuaannga misissuillutillu qaqugu ilaassanersunga taannartaalu aaqqiiffiginiarsarivaat. Qaqugu uternissara qulakkeeriarukku iluamik akisinnaassaanga, Makka Kleist oqarpoq.
Pilersaarusiornerit ajunngitsumik ingerlassappata isiginnaartitsisartup naatsorsuutigaa septembarip qeqqata missaani immiutsissalluni.
