Hollywood-imut alloriarneq siulleq

Amerikamiu filmiliaritittartoq Ben Stiller filmini "Tropic Thunder"-imi aamma "Night at the Museum"-imi ilisimaneqartoq nutaamik suliaqaleruttorpoq. Filmip aterissavaa "The secret life of Walter Mitty” filmimilu tassani kalaallit isiginnaartitsisartut marluk atorneqassapput. Taakku sapaatip akunnerata naanerani Nuummi nassaarineqassapput.
Allattoq Peter Troelsen, Noah Mølgaard
maajip 07-at 2012 08:18

Kalaallinit kingoqqisuuit aammalu 30-it 60-illu akornannik ukioqarlutit filmimilu pikkorissut suliaanni peqaarusullutit? Taava periarfissaqarsinnaavutit sapaatiuppat Nuummi Hotel Hans Egede-liaruit. Tassanimi filmimi inuttaasinnaasunik misilitsitsisoqassaaq tassani Ben Stiller-ip filmiliassaani inuit marluk nassaarineqassammata.

Isiginnaartitsisartut tassaassapput arnaq allakkerivimmi sulisuusaartussaq aamma angut helikopterimik aquttuusaartussaq. Filmip ilai taakku septemberimi Islandimi immiunneqassapput.

- Inuttassatut perusutavut tassaapput kalaalerpaluttumik isikkullit. Arnaq 30-it 60-illu akornannik ukiulik qanoq isikkoqarnissaani immikkut piumasaqarfigineqanngitsoq aamma angut 40-ut 60-illu akornannik ukiulikm aneernisoq maattugunartorlu. Taakku arlaannut piukkussorigaanni sapaatiuppat Hotel Hans Egede-mut takkuttariaqarpoq, Michael Rosing KNR-imut oqarpoq, taassumalu Ben Stillerip filmiliassaani kalaallit nassaarinissaat suliaraa.

Soqutiginnittut aamma Facebook atorlugu saaffiginnissinnaapput ”Casting Nuuk The secret life of Walter Mitty” atorlugu imaluunniit mittycasting@gmail.com emailikkut allaffigalugu. Taakku atorlugit inuttassarsiuilluni misilitsinnissamut piffissamik inniminniisoqarsinnaavoq aammalu misilitsinnermi takutitassaq sungiusagassaq pissarsiarineqarsinnaalluni. Aamma allannissamut periarfissaqanngikkaanni Hotel Hans Egede-mut takkuttoqarsinnaavoq nalunaaqutaq 15.00-ip aamma 18.00-ip akornanni.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq