Hollandimiut pillugit Namminersorlutik Oqartussat pinngitsuutitaapput

Peqqissaasut Kattuffiata Namminersorlutik Oqartussat peqqissaasunut isumaqatigiissutinik unioqqutitsisimasutut unnerluutigaat, ilaatigut peqqissaasut Hollandimiut maanga suliartornissaminnut piareersarlutik oqaatsinik pikkorissarnerinut akissarsitinneqarnerinut tunngatillugu.

Namminersorlutik Oqartussat Akerleriissutit Suliarineqartarfianni - voldgiftimi - siulittaasumit Eqqartuussiviit qullersaanni højesteretimi eqqartuussisumit Børge Dahlimit pinngitsuutinneqarput. Tassani pineqartoq pingaarneq tassaalluni Namminersorlutik Oqartussat oqaatsinut kulturimullu tunngasunik ilinnniartinneqartunut akissarsiaqartitsisinnaaneq pisinnaatitaaffigigaat.

Eqqartuussiviit qullersaanni eqqartuussisoq Børge Dahl illuatungeriinnut kajumissaarivoq apeqqutit suli saqitsaassutaasinnaasut oqaloqatigiinnikut isumaqatigiinniarnikkullu aaqqiiviginiaqqullugit.