Hollandimi partiit aatsaat taama amerlatigisut qinigassanngortitsisut
Partiit 28-t sassartitaqartut akornanni 14-it isertitaqarnissaat ilimagineqarpoq. Inunnik isumasiuinerit tamanna takutippaa.
Partiillu qinigassanngortitaqartut assigiinngitsorpassuarnik soorunami anguniagaqarput suliniuteqarniarlutillu.
Partiip talerperliuniap "Frihedsparti"-p, Geert Wildersimik siuttoqarluni nunasisut kinaassuserlu pingaarnertut oqallisigivai.
Oqallisigisassat taakku partiip naalakkersuisuutitaqartup liberaliusup ministeriuneq Mark Rutte siuttoralugu, aamma ukkatarai, nunasisut Hollandimit qimagunnissaat allaat qineqqusaarutiginiarlugu.
Nunasisullu piumasaqaateqarfigineqarnissaat socialdemokratit aamma qineqqusaarutigaat.
Hollandimili aamma parteeqarpoq allanalaarsinnaasunik qineqqusaaruteqartut.
Partiip "Partij voor de Dieren"-ip uumasut atugarissaarnissaat pingaarnertut qineqqusaarutigaa. Assersuutigalugu neqimut taarsiullugu allamik nerisaqartoqarnissaa suliniutiginiarpaa, guldfiskinillu aalisagaateqarsinnaaneq inerteqqutiginiarlugu.
Partiip "Artikel 1"-ip allamiunut assuarinninneq akiorniarsaraa. Ammit qalipaataat, suiaassuseq, upperisaq anguteqatiminoortartuuneq, arnaqatiminoortartuunerluunniit apeqqutaatinnagu tamat naligiinnissaat partiip taassuma anguniarpaa.