HIV-mik tunillatsissimasut illersuuteqaratik atoqateqarsinnaanngussapput
AIDS akiorniarlugu aningaasaateqarfimmi pisortaq, Henriette Laursen, oqarpoq, tamatumunnga tunngavissaqarluartoq.
- Katsorsartinnissamut periarfissat nutaat pillaasarnermut inatsimmut sanilliullugit atorneqartariaqalerput, Henriette Laursen oqarpoq.
Inatsisip atorunnaarsinneqarnissaa amerlanerussuteqartunit ukiualunnguit matuma siorna akerlerineqaraluarpoq, nakorsaatilli katsorsaariaatsillu nutaat politikerit allatut eqqarsalersippaat.
Danmarkimi inatsisip allanngortinneratigut HIV-mik tunillatsissimasunut isiginnittarneq allanngussasoq, Henriette Laursenip aamma neriuutigaa.
- HIV-mik tunillatsissimasorpassuit ingerlariaqqissinnaanngitsutut uparuartorneqartartutullu misigisimasarput. Nappaat taanna kisimi pillaasarnermut inatsiseqarpoq. Taamaammat isumaqarpunga, inatsisip allanngortinneqarnissaa HIV-mik tunillatsissimasunut iluaqutaassaqisoq, AIDS-ip aningaasaateqarfiani pisortaq aamma oqarpoq.