Koda Awards: Hip hop elektronikkimillu nipilersortartut nersornaaserneqartut
Ukiumut nersornaat Don Malikomut, tassa Malik Egedemut tunniunneqarpoq, Don Malikop saqqummersitaa taaguuteqarpoq 'II'. Don Malikop taalliai immikkut naliliisartunit maluginiarneqarsimapput.
- Siullermik taalliarisaasa imai takutitsipput inuusuttuaraajunnaarluni - inersimasunngorsimasoq, tassa "Don Maliko" Malik Egede, Kodap nersornaasiuttagaanut naliliisartoqatigiinnersoq, tusagassiortorlu, Noah Mølgaard oqarpoq nangillunilu:
Erinarsuummi "Ikumatitara"-mi atugaa naliliinermi tunngavilersuutaangaatsiarpoq, ikiaroornartumik atornerluisuunerminngaannit qaangiineq taavalu tamanna qaangerneqarsinnaasoq pillugu inuusuttunut takutitsinertut nalilerneqarpoq.
Nipilersortartut ukiumut nersornaammut innersuunneqartut allat tassaapput: Yenso, Jens Ole Nathanielsen - saqqummersitaa ’Perserartoq’ aamma Nick Ørbæk - saqqummersitaa ’Saappara’.
Saqqumilaanngitsoq nersorneqartoq
Isumalluarnartumut nersornaat Hans-Ole Amossenimut tunniunneqarpoq. Hans-Ole Amossen Da Bartali Crewimut aallarniisoq nipilersornermi saqquminiartuunngikkaluarluni nutaaliortuusoq naliliisartoqatigiinnit toqqarneqarpoq.
- Hans-Ole nunatsinni nipilersornermik nutaaliortuuvoq, tamannalu pissutigalugu nipilersortartoqatiminit maannakkut ataqqisaasorujussuuvoq, inuttut saqquminiartuunngikkaluarluni nipilersornikkut pilersitai nutaaliortuupput, soorlu atortorissaarutit nutaaliat atorlugit nutaaliorsinnaanermik takutitsisuuvoq, Kodap nersornaasiuttagaanut naliliisartoqatigiinnersoq, Noah Mølgaard oqarpoq.
AAMMA ATUARUK Nipilersortartunut nersornaatit Sisimiuni tunniunneqassasut
Hans-Ole Amossen oqaluttuarpoq nersornaasiinermi atini taaneqarmat tupassimalluni.
- Soorunami tupaqqalaarpunga kisianni tulluusimaarnaqaaq taamaattumik nuanneqaaq, nersornaaserneqartoq oqarpoq nangilluni:
Soorunalimi nersornaaserneqartoq siunissamut piumassuseqarnarnerulerpoq, saqqummernissannullu soorlu piumassuseqarnerulerlunga, Hans-Ole Amossen oqarpoq.
Nersornaammut innersuunneqartut allat tassaapput: Sound of the Damned aamma Malu Rohmann.
