Hillary Clinton præsidentimut 2020-mi qinersisoqarnissaanut sassarnianngitsoq
Nutaarsiassaqartitsivimmit CNN-imit apersorneqarluni tamanna uppernarsarpaa.
USA-p præsidenterisimasaata nuliata, senatoriullunilu nunanut allanut tunngasunut ministeriusimasup, præsidentitut sassarnissani suli mattutinngikkaa, USA-mi tusagassiorfiit ukioq manna januaarimi ilaatigut allaaserigaluarpaat.
Hillary Clintonili maanna tassa erseqqissaatigaa Donald Trump aappaagu 2020-mi qinersinissami unammillerniarnagu:
- Sassarnavianngilanga, sulissutigerusutakkali, oqallisererusutakkalu, upperisakkalu attanniarpakka, Hillary Clinton oqarpoq.
USA-mi demokratit sinnerlugit præsidentimut sassartut maannamut aqqaneq-marluupput, præsidentimut aappaagu 2020-mi novembarimi qinersisoqarnissaata tungaanut USA-mi præsidentinngorniunneq sioqqullugu partiit sassartitassaannik qinersinerni taakku unammisussaallutik.
