Heunicke: Covid pillugu killilersuinerit sapaatit akunnerinik pingasunik sivitsorneqarput

Danskit naalakkersuisuisa covid-19-imik tuniluuttoqannginnissaa pillugu killilersuinerit matusinerillu maanna atuuttut sivitsorneqarnissaat aalajangerpaat. Peqqissutsimut ministeri, Magnus Heunicke (S) pingasunngornermi danskit nalunaaqutaaq naapertorlugu unnukkut taama paasissutissiivoq.

Taamaalillutik meeqqat atuarfiani atuartut ilinniartullu avataanit ilinniartinneqaannarallassapput.

Pisiniarfissuit assigisaallu matussapput, kiffartuussinermillu inuussutissarsiortut nammiinersortut – assersuutigalugu nujaleriffiit – aamma matoqqatinneqassallutik. Tamanna neriniartarfinnut, imerniartarfinnut, sutorniartarfinnut assigisaanullu aamma atuuppoq, taakkunanngali nerisassanik annissassanik tuniniaasoqarsinnaavoq.

AAMMA ATUARUK Mette F nunatsinnut juullimut inuulluaqqussummi: Sumiiffiit ikittuinnaat corona pillugu ilissitulli taama pitsaatigisumik suliaqarput

Killilersuinerit januaarip ulluisa 17-ianni atorunnaartussaagaluarput. Tuluit Nunaannit virusimik allanngortumik – B117-imik - tunillatsissimasunik 208-inik Danmarkimi uppernarsaasoqarsimasoq, peqqissutsimut ministeri tusagassiortunik katersortitsinermi oqarpoq. Tamanna ernumanartuunerarpaa.

Tunillatsissimasunit 859-it napparsimmavimmi uninngapput. Taakku sapaatip-akunnerata siulianut sanilliullugit ikinnerupput, taamaakkaluartorli upernaaq uninngasut amerlassusaanit amerlanerungaatsiarlutik.

Tunillatsissimasunik nutaanik 1358-inik pingasunngornermi aamma uppernarsaasoqarpoq. Taama amerlatiginerat ulluni kingullerni aamma taamaappoq, tassa tunillatsissimasutut ullormut uppernarsarneqartartut 1000-init amerlanerusarlutik.