Helle Thorning-Schmidt Naalagaaffiit Peqatigiinni atorfininngitsoortoq
Atorfik ataqqinaataasoq innersuunneqartumut allamut italiamiumut Filippo Grandimut tunniunneqarpoq.
Naalagaaffiit Peqatigiinni generalsekretæri, Ban Ki-Moon, pingasunngormat unnukkut taama ilisimatitsivoq.
Naalagaaffiit Peqatigiit taamaalillutik Helle Thorning-Schmidtip ministeriunerusimanera aammalu inatsisartutut misilittagaqarnera pinnagu Naalagaaffiit Peqatigiinni sulinermik aammalu qimaasut pillugit misilittagalimmik toqqaapput, DR taama allaaserisaqarpoq.
AAMMA ATUARUK Thorning FN-imi atorfimmut pingaartumut innersuunneqartoq
Filippo Grandi Naalagaaffiit Peqatigiinni atorfilittatut 1988-imiilli sulivoq Naalagaaffiit Peqatigiillu sinnerlugit nunani arlalinni aallartitatut aamma sulisimalluni.
Helle Thorning-Schmidt danskit nalaakkersuisuinit ministeriunermillu Lars Løkke Rasmussenimit septembarip sisamaani pisortatigoortumik atorfimmut innersuunneqarpoq.
Kingorna atorfinitsitsiniarnermi ataatsimiititaliap immikkut ittup innersuunneqartut pingasuusut oqaloqatigisimavai, Helle Thorning-Schmidt, Filippo Grandi aamma Tysklandimiu Achim Steiner.
DR naapertorlugu Italiamit innersuunneqartoq toqqaaniarnermi nukittuumik inissisimasimasoq. Taannami UNHCR-imi misilittagaqarpoq aammalu Italia ukiuni kingulliunerusuni qimaasorpassuarnik tigusisimalluni.