VIDEO Heliskiing takornariartitsissutigissallugu ajornakusoortoq

Kangaamiuni, Maniitsumi, Nuummi Qeqertarsuup Tunuanilu heliskiingissalluni qaammatini sisamani periarfissaavoq. Naak Arne Hardenberg suliffeqarfiutinilu Greenland Extreme nunatsinni kisimi heliskiingimik sullississaraluarluni suli ingerlallualinngilaq. 

- Inuit maanga ajornaquteqanngitsumik heliskiingeriartortartitalersinnissaat anguniagaara, Arne Hardenberg KNR-imut oqarpoq.

USA-mit aqqut takivoq

USA-meersut Kevin O´Rourke OL-imilu sisupiloornermi marlorialuni peqataasimasoq Pete Patterson ulluni makkunani tikeraartorai. Taakkua suliffeqarfiutertik Mountain Spirits, aamma heliskiingeriartunik angallassisartoq, aqqutigalugu heliskiingertarfiit nunarsuarmi annersaasa ilaat Alaskamiittut, Chilemiittut Ruslandimiittullu tikissimavaat.

Nunarpullu immikkuullarissutut isigaat.

- Nuannerluinnarpoq. Sisorarnerinnaq pineqanngilaq, Kalaallit nunaatali tunniussinnaasai tamarmik pineqarput: Pinnissuseq, sisorarneq, inuit kulturilu, Pete Patterson oqarpoq.

Aamma atuaruk Issittumi takornariartitsineq siuariartorfiujuarsinnartoq

Angalatoorli misilittagartooq nersualaarinnigaatsiaraluartoq, sisorariat amerlanngillat.

- Ukiumut katillugu sapaatip akunneri pingasuinarnni sisorartitsisarama, inuuniutigisinnaanngilara.

- Helikopterimut ilaallutik qaqqnut tikinneqajuitsunut sisorariarusuttut amerlanngillat.

 Taamaattumik inuussutissarsiutigissallugu unammillernarpoq, Arne Hardenberg oqarpoq.

Tamannalu Pete Pattersonip 2001-mili nunatsinnut sisorariartitsisalersimasup ilaliinnarsinnaavaa.

- Inunnik Kalaallit Nunaannukartitsiniarneq ungasimmat unammillernarnerpaavoq. Aqqut akisuvoq. Ingammik  Amerikamiit.

- Maangarnermut ullut marluk atugassaapput, utimullu aamma taamak, Pete Patterson oqarpoq.

Heliskiing tassaavoq helikopterimik qaqqap qaavanut angallanneqariarluni ammut aputikkut tutineqanngitsukkut sisorartarneq.