Helene Thiesen: Ukiorpassuit qaangiukkaluartut naapikkaangatta qiasarpugut
Danmark-imi Isumaginninnermut Utoqqarnullu ministeriaqarfiup (Social- og Ældreministeriet) meeraallutik misileraatigineqarsimasut sinnerinut arfinilinnut taarsiissuteqarniarneq itigartitsissutigaa.
Taamaammat suliassaq eqqartuussivimmi suliassanngorpoq.
Ullumi kinguneruttut arfinillit ilaat 77-nik ukiulik Helene Thiesen oqarpoq, ataasinngormat itigartinneqarnertik tusaramiuk tusakkani upperisimanngikkaluarlugu.
- Uanga tupaqaanga. Eqqarsarlunga: Sooruna itigarteqattaaginnaraatigut? Taamalu ersaritsigisoq…aap, taama inatsisaatsuliorneq. Naggueqatigiit Inuit, inuit kikkulluunniit uagullu taamatut pineqartussaanngilagut.
AAMMA ATUARUK Misileraataasimasoq: Eqqartuussivimmi suliarinissaa tulluanngilaq
Helene Thiesen Nuummi ilaquttaminiit qimagutitinneqarami arfineq marlunnik ukioqarpoq. Taanna meeqqallu allat 21-t ilagalugit misilittaatigineqartussatut aallartinneqarput.
Meeqqat qallunaanngorsarneqarnissaat siunertaavoq, taakkua maligassiuisussatut Kalaallit Nunaannut uterniassammata.
Angerlaqqikkaluaramilli kalaallisut oqalussinnaajunnaarsimapput, ilaquttaminnilu najugaqaqqusaanatik.
Meeqqat taamaammat børnehjemmimi inissinneqarput.
Ajorluinnarpoq
Meeqqat taakkua 22-t sinneri arfinillit siorna pisortatigut statsminister Mette Frederiksen-ip (S) utoqqatserfigai.
Tamatuma kingorna tamarmik immikkut 250.000 koruuninik taarsiiffigineqarnissartik piumasaqaatigaat.
- Uagut ingerlaqqissimasugut nalunngilaat, Danmark-ili nikeriarsimanngilaq. Itigartitsinerminnut iluamik tunngavilersuinnginnerat paasisinnaanngilara. Tamanna ajorluinnarpoq, Helene Thiesen oqarpoq nangillunilu:
- Uagummi suli tamanna ilungersuutigaarput. Naapikkaangatta qiasarpugut – ukiut taama amerlatigisut qaangiukkaluartut. Issiaqatigiilluta eqqartuileraangatta qiasariaqartarpugut, pineqarsimanerput inuppalaanngilluinnartumik peqqarniingaarmat.
Utoqqatserneq naammanngilaq
Kalaallit Nunaanniit Danmark-imut umiarsuarmik aallarlutik unnuaq siulleq taassuma eqqaamavaa:
- Unnuaq taanna tamatta innarluta qissappugut. Inersimasut inimiit inimut arpaqattaarlutik tuppallersarniarsarivaatigut. Tamattali tuppalligassaanngilagut. Tamanimiilli ilutsigut qianikuuvugut.
Siorna, Mette Frederiksen utoqqatsermat nuannaarpusi. Tamanna naammanngila?
- Naamik, naammanngilluinnarpoq. Utoqqatsiinnarsinnaanngillat, soorlu ajattoorsimalluta orlutissimasutut. Taamaattoqarsinnanngilaq. Iliuuseq taama peqqarniitsigisoq tuoqqatsiinnarneq naammassinnanngilaq. Ilaqartariaqarpoq. Taarsiiffigineqartariaqarpugut, Helene Thiesen oqarpoq.
AAMMA ATUARUK Kalaallit meeraat taarsiiffigineqarnissaminnut itigartinneqarput – maanna naalagaaffik eqqartuussisunut sassartinniarpaat
Itigartitsineq pillugu Social- og Ældreministeriet KNR-ip oqaaseqartinniaraluarpaa.
Apeqqarissaarnissaq periarfissaqarsimanngilaq, ministeriaqarfilli mailikkut KNR-imut allappoq:
- Social- og Ældreministeriet nalunaarsinnaavoq eqqartuussivimmut sassartitsiniaaneq utaqqillugu. Taanna tiguneqareerpat, taarsiissuteqarnissamut apeqqut ministeriaqarfiup isummerfigiumaarpaa.
Meeqqat misilittaatigineqartut sinneri arfinillit eqqartuussissuserisuat KNR-imut nalunaarpoq, eqqartuussivimmut sassaqqusineq ataasinngormat nassiunneqartoq.