Hasheerniat Pusher Streetimi tuniniaavii Christianiamiut piiaraat

Christianiami najugallit hasheerniat "Pusher Street"-imi pisiniarfeeraat taamaammat ullaaq manna namminneq piialerpaat. Tusagassiortoq Ritzauimeersoq taama oqaluttuarpoq.

Inuit 100-t missaat piiaanermi peqataapput, eqqissisimasumillu tamanna pisoq nalunaarutigineqarpoq.

Angut 25-nik ukiulik politiinit tigusariniarneqarnermi nalaani qanittukkut aallaasersulerpoq, politiit marluk inuinnarlu ataaseq eqqorlugit, politikerillu assigiinngitsut Christianiamiut kajumissaarpaat ikiaroornartunik tuniniaasartut akiorniarneqarnerannut peqataaqqullugit iliuuseqaqqullugillu. Politiip aallaaneqartup aappaa suli peruluttoq nalunaarutigineqarpoq.

Christianiami hashimik tuniniaaviit peersimanissaat Christianiami najugallit neriuutigaat. Oqaaseqartitaat Risenga Manghez hasheerniat pisiniarfeeraat piiarneqaleruttorneranni taama oqarpoq.

Københavnimi politiit ikiaroornartumik immikkut akiuiniarnermut atorneqartut aasaq naallugu immikkut iliuuseqaqattaarput, pingaartumik Christianiami iliuuseqartarlutik. Pusher Streetimi hasheerniarfiit piiartarpaat, tuniniaasartulli pisiniarfeeqqatik kingorna nappaqqiinnartarsimavaat.

Angut aallaasersortoq 25-nik ukiulik tigusarineqarnermini politiinit aallaaneqarnermigut ikilerneqangaatsiarpoq, ajoquserninilu unnuaq toqqutigisimagai politiit maanna aamma nalunaarutigaat.

/ritzau/