Harvey USA-mi pinngortitami ajunaarnersuarni akisunerpaanngorsinnaasoq
Texasimi ulluni kingullerni siallerujussuartarnera illoqarfissuup Houstonip oqaluttuarisaanerani aatsaat taama qarsutsineqarneranik kinguneqarpoq, silamillu ilimasaarutit ulluni aggersuni silagissinissaanik takutitsinngillat.
Ulussaarsuup Harveyip sapaatit-akunnerata naanera sioqqullugu nunamut anngummst kingornalu kiattup anorersuaatut nalilerneqarluni, USA-p illoqarfiisa anginerit sisamaanni Houstonimi sumiiffinni arlalinni 80 centimeteringajannik siallerpoq.
- Houstonip oqaluttuarisaanerani qarsutsinernik ajunaarnersuit anginersaraat. Aatsaat taama siallertigitillugu takuarput, Steve Bowen sillimmasiisarfimmi Aeon Befieldimi silasiortut pisortaat nutaarsiassaqartitsivimmut Reutersimut taama oqarpoq.
Illoqarfiup aqquserngi arlalissit meterinik arlalinnik qarsunneqarsimapput.
Aviisi Houston Chronicle allappoq atuarfiit amerlanersaanni atuartitsineq sapaatit-akunneranni aggersumi taamaatiinnarneqarsimasoq.
Parnaarussivinni pingasuni parnaarussat qarsutsinerit pissutigalugit qimagussortinneqarsimapput, oqartussallu innuttaasut kaammattorpaat angerlarsimaffimminniiginnaqqullugit.
Taamatut kaammattuuteqarneq illuni qarsutsinermit eqqugaasimasuni najugaqartunut aamma atuuppoq, aqqusinerpassuimmi angallavigineqarsinnaanngillat. Illoqarfimmi innuttaasut 2,3 millioniusut pisariaqassappat illut qaavinut qaqinissaannik kaammattorneqarput.
Annaassiniartartut sapaatiummat unnukkut inuit 2000-it sinnerlugit nussorsimavaat, ilaatigut umiatsiat atorlugit.
Houstonimi timmisartoqarfiit marluusut sapaammi timmisartuussinissat tamaasa taamaatiinnarpaat, Houstonillu umiarsualiviata oqaaseqartartuata sapaatiummut unnukkut ilisimatitsissutigaa suliaqarfiit tamaasa ataasinngornermi matoqqatinneqassasut.
AAMMA ATUARUK Texasimi anorersuarujussuarneranit inuit 30-it ujaarineqarput
Ulussaarsuup Katrinap 2005-imi pisup kingorna USA-mi anorersuit sakkortunersarivaat.
Silarlunneratalu aningaasatigut kingunerlutsitserujussuarnisssa naatsorsuutigineqarpoq. Amerikamimi uuliamik gassimillu suliffissuaqarnerup qitiusoqarfik Harveyimit eqqugaavoq. Akuiaaviit arlalissuit matuneqartariaqarsimapput sinerissallu avataani uuliasiorfinnit aamma qimagussortitsisoqarsimalluni.
- Qanoq siallertiginera eqqarsaatigalugu ajoqusernerit Katrinap kingornatulli annertutigisinnaapput, Loretta Worters The Insurance Information Institutemeersoq Reutersimut taama oqarpoq.
Louisianap Mississippillu ilarujussui ulussaarsuarmit Katrinamit qarsutsinneqarput. Ajoqusernerillu iluarsaanneqarnissaannut nuna tamakkerlugu ajunaarnersuarmut aningaasaateqarfimmit 15 milliardit dollarit aningaasaliissutigineqarsimapput.
Ulussaarsuaq Katrina, Reuters naapertorlugu, USA-p oqaluttuarisaanerani pinngortitami ajunaarnersuit akisunersarivaat.
Harvey aamma kiattup anorersuaanut Texasimi 2001-imi meteri sinnerlugu siallertitsisumut angerlarsimaffiillu 70.000-it qarsunneqarnerinik kinguneqartumut 9 milliardit dollarillu nalinginut ajoqusiisusumut assersuunneqarpoq.
USA-mi sillimmasiisarfiit pigisat inuinnarnit pigineqartut qarsutsinerit kingunerisaanik ajoqusernerinut taarsiissuteqarneq-ajorput. Ajoqusernerilli anorimik pissuteqartut taarsiissuteqarfigineqartarput, Reuters taama allappoq.
/ritzau/
