Harper neriorsuivallaarpoq
Canadami ministeriuneq qinigaaqqeqqammersoq Stephen Harper, qineqqusaarnermi naammasseqqammersumi Canadap Issittumi namminersortuuneranik pingaartitsisorujussuuvoq, sakkutuunillu atuinikkut illersorneqartariaqarnera oqaatigalugu. Tamannali qineqqusaarnerinnaanersoq apeqquserneqarpoq.
USA-p Canadami ambassadøriata oqaaserisimasai, allakkani isertuussaasuni saqqummiunneqartuni imatut oqarsimavoq:
" Issittoq pillugu Harperip oqaaserisimasai qineqqusaarutaanerupput, Canadap issittortaanut suliniuteqarnissaminik neriorsuutigisartakkani qinersineq qaanngiukkaangat, qaqutigut piviusunngortittarpai"
USA-p Canadami ambassadøriata, Stephen Harper januaarip qaammataani akunnerit arlaqartut oqaloqatigigamiuk, maluginiarsimavaa, Harper, issittoq pillugu oqaatsimik ataatsimilluunniit eqqaasaqarsimanngimmat.
Sinerissami umiarsuarujussuit nakkutilliissutit Canadap issittortaani nakkutilliisussat, sananeqarnissaanik neriorsuisimanera, polikkikkut tunngasut aallaaviginerullugit sananeqassapput. Umiarsuit taakkua sakkutuut imarsiortuinit kissaatigineqarsimanngikkaluartut, USA-p Canadami ambassadøria allappoq.
Allakkiani isertuussaasuni saqqummiunneqartuni Harperip USA-mut piumasaqaatai aamma saqqummiunneqarput.
Harper Canadami inatsisartunut qinersineq 2008-mi pisoq sioqqullugu USA-mut piumasaqarsimavoq, USA-p issittumi suliniutai qinersinerup kingorna saqqummiunneqassasut, Canadami qineqqusaarnerminut ajoqusiisinnaammata.
