Hans Lyngep allagaataanik toqqortat Nunatsinnut utertinneqarput

Hans Lyngep, imaluunniit Hansinnguup, taalliai, isiginnaartitsissusiai tusarnaagassiaalu, oqalugiaatai, ullorsiutaalu assammik maskiinamillu allatat 1988-imi toqunerata kingorna, Hans Lyngep nuliaata Inge Lyngep Snekkerstenimi angerlarsimaffimmini paarisimavai. Taakkulu Nunatta Københavnimi Aallartitaqarfianiitissinnarlugit maanna Nunatsinnut utertinneqarput.

Anthon Møllerip, Eskimologimi BA-jusup, Nunattalu Aallartitaqarfiani ilinniartutut ikiortaasup allagaatit immikkoortiterlugit, salillugit nalunaarsorlugillu pingaarutilimmik suliaqarsimavoq. Taamatut suliaqarneq 2011-mili aallartinneqarpoq. Allagaatit karsini pingasuniitinneqartut, Københavnimit Nuummut timmisartukkut nassiunneqarput Nunattalu Allagaateqarfianut Ilimmarfimmiittumut tunniunneqarlutik.

-Kulturikkut suliniuteqarsimasut politikerillu oqalugiaatiminnik, suliaminnik allanillu Nunatta Allagaateqarfianut tunniussisarnissaat pingaaruteqartupilussuuvoq. Taamaaliornikkummi oqaluttuarisamik siunissami kinguaariinnut ingerlateqqinneqarnissaat qulakkeersinnaavaat. Ukiuni tullerni 80-ini allagaateqarfimmiitinneqassapput, assersuutigalugulu ilisimatuunit taamaallaat alakkarterneqarsinnaassallutik. Taamaaliussagunillu piginneqqaartussaatitaasoq apereqqaartariaqarpaat, matumanilu Hans Lyngep Aningaasaateqarfia piginneqqaartussaatitaavoq. Hans Lyngep allagaataanik toqqortanik pissarsinerput nuannaarutigeqaarput, utertinneqannginnerinilu Københavnimi annertuumik suliarineqareersimammata piareeqqatillugit tiguagut, Nunatta Allagaateqarfiani allagaataasivimmi ningiu Grete Rendal knr.gl.-imut oqarpoq.

Allagaatit toqqortarineqartut Nunatsinnukaanneqarnissaat Hans Lyngep Aningaasaateqarfiata tungaanit ukiorpassuarni kissaatigineqarsimavoq. Aningaasaateqarfiup siulittaasuuata Hans Lyngeugaluullu nuliata Inge Lyngep Hans Lyngep allattariarsorluni suliarpassuisa angerlartinneqarnerat iluarisimaartupilussuuaa.

-’Hansinnguup' allattariarsornikkut suliarpassui kalaallit kulturikkut kingornussaasa ilagaat pingaarutillit, taamaammat neriuutigaara ilisimatuunit allanillu kalaallit eqqumiitsuliaannik, kulturiannik oqaluttuarisaanerannillu soqutigisalinnit atorluarneqarlutillu nuannaarutaajumaartut, Inge Lynge tunniussinermut atatillugu oqarpoq.