Hans Lothsen Semsen katersuineq pillugu: Attortinnaqaaq

Nanortalimmiu innarluutilik, 71-nillu ukioqartoq, nammineq piumassutsimik maanna katersuiniunneqarpoq.
Hans Lothsen Semsen niaqqumigut 2014-imi ajoqusereerluni kaassuartakkanik ingerlateqartalerpoq. Assi © : Innarluutillit illersuisuat / Handicaptalsmanden
Allattoq Kathrine Kruse
decembarip 11-at 2019 14:12

- Tusarlerneqarama - taama ilimasunnanga - qullilissutiginikuuara utoqqassitutut tigullugu, kisiannilu tuppallissutigeqalugu aappaatigut qullilinikuuvunga. Taama Hans Lothsen Semsenip katersuiniunneqarnini pillugu ilisimatinneqarami qisuariaatini oqaluttuaraa.

71-nik ukiulik Hans Lothsen Semsenip innarluuteqalersimasutut ulluinnarsiutai innarluutillit illersuisuata Kujataani angalareerluni nalunaarusiaa saqqummiunneqarmat ilisimaneqalerput.

Taassumami nammineq illoqarluni kaassuartakkanik atuisutut ulluinnarni atukkani ilungersunarsinnaasut oqaluttuarai.

- Ikioqqussummik saaffiginnikkaangama ilaanni ima aperitittarpunga "naammi kammalaatitit?", Hans Lothsen Semsen innarluutillit illersuisuata Kujataani angalanermini nalunaarusiaa saqqummeqqammersoq KNR-mut taama ilaatigut oqaluttuarpoq.

Taanna Nanortalimmiuuvoq 2014-imilu niaqqumigut ajoqusernermi kingorna pisussinnaajunnaarpoq, kaassuartakkanik atuisunngorluni.

AAMMA ATUARUK Kommune til person med handicap: Hvor er dine venner?

Illumi tummerai innarluutilinnut naleqqussartikkusullugit kommuunimut saaffiginnikkaluarami ikiorneqarsinnaasimanngilaq.

Taamaattumillu kaassuartakkani anilernini tamaasa nammineq tummeqqakkut ammukaattariaqartarpai.

- Saaffiginnikkaangama ima akineqartarnikuuvunga "uagut akissaqanngilagut", Hans Lothsen Semsen KNR-imut sapaatip akunnera kingulleq taama oqaluttuarpoq.

Hans Lothsen Semsen assigiinngitsunit katersuiniunneqartoq

KNR-imit Hans Lothsen Semsen pillugu oqaluttuaq saqqummiunneqareersorlu nunap immikkortuinit assigiinngitsuneersut marluk maanna pineqartumut katersuiniussipput.

Katersuiniussisut aappaat tassaavoq Uummannameersoq Pavia Nielsen. Taassum Hans Lothsen Semsenip oqaluttua inuttut attortissutigisimavaa nammineq kaassuartakkamik atuisumik qanigisaqarnikuungami.

- Assorujussuaq misiginneqatigigakku. Takorluuillungalu allaat erninnguarput aamma taamatut nukillaariartornermik aqqusaarneqarnikuummat. Allaat upippara, Pavia Nielsenip Hans Lothsen Semsenimut katersuiniussinini pillugu taama tunngavilersuivoq.

Pavia Nielsenip saniatigut aamma allat Hans Lothsen Semsenimut Facebooki aqqutigalugu katersuiniussipput.

Taakkua Hans Lothsen Semsenip kissarsuutaa kiassaatitut atorneqartarsimanermi kingorna ajortissimammat katersuiniuppaat. Aningaasallu taakkunannga katersorneqartartut kissarsuummut nutaamut pisinissamut atorneqassapput.

- Tamatta nalusarparput ullormiit ullormut qanoq pineqarnissarput. Taamannak tusarluni aappaatigut qamuuna attortinnaqaaq, Hans Lothsen Semsen oqarpoq.

Pavia Nielsenip oqaluttuaraa Ittoqqortoormiiniit, Ilulisaniit aamma Uummannamiit, katersuiniussilluni kontomut Grønlandsbankimi pilersissimasaanut, tapersiisoqarsimasoq. Kisiannili katersat maannamut qassinngorsimanersut oqaatigisinnaanngikkallarpaa.

Hans Lothsen Semsenimut katersuiniussisut arlaasa maannamut 3.328 koruunit katersoreersimalerpaat.