Hans Jukku show Ilulissani
Hans Jukku Show kulturikkut illorsuarmi Katuami aasaq ukiarmilu iluatsilluartupilussuuvoq. Maannalu Ilulissani aliikkusersuisussanngorput, illarumatuullu tallimanngornermi februaarip aallaqqaataani aliikkusersorneqassallutik.
- Katuami aliikkusersuinitta assigeqqissaassanngilaa. Aliikkusersuinitta ilarujussuata malaatiinnarlugu ingerlattarparput, taamaammat nutaartaqanngitsoornavianngilaq, Hans Jukku Noahsen KNR.gl-imut oqarpoq.
- Aliikkusersuinerup aallaavittut akunnermik ataatsimik sivisissuseqarnissaa oqaatiginikuuarput. Piffissamulli tungatillugu pittorsimanngilagut, taamaammat kulturikkut illorsuarmi Sermermiuni isiginnaariat qanoq nuannisartiginerat aliikkusersuinerup sivisussusissaanut aalajangiiumaarpoq, Hans Jukku Noahsen oqarpoq.
Hans Jukku Noahsen pattattartorlu Nukannguaq Geisler ukiorpassuarni ikinngutigiipput nipilersunngikkaangamillu quianartuliortarsimaqalutik.
Quianartuliortarnerat Nuummi, Qaqortumi, Narsami Maniitsumilu aliikkusersuineranni nuannarineqarluartarpoq.
- Illoqarfinnit allanit qaaqquneqartaraluarpugut, aalajangersimasumilli suliffeqaratta taakku salliutittariaqartarpagut, Hans Jukku Noahsen oqarpoq.
Hans Jukku Noahsenip nuimasunik ilaarsisarnera ilisimaneqarluartoq kisiat illartitsineq ajorpoq. Nukannguaq Geisler ikinngutini assingalugu aamma quiasaarillaqqittupilussuuvoq.
- Aliikkusersuinermi nipilersorluta akunniliisarumaarpugut, Hans Jukku Noahsen oqaluttuarpoq iluliarmiunillu illarumatuunik tallimanngormat unnukkut naapitaqanissani neriuutigalugu.