Hans Enoksen: Innuttaasut paasissutissamik pissarsinissartik akisussaaqataaffigaat

Inuusuttut arlaqartut namminersornerup namminersulivinnerullu assigiinngissutaat sunaanersoq suli paasisimanngilaat. Taasisitsineq sioqqullugu paasisitsiniaanersuaqartussaavoq, taassumalu saniatigut innuttaasut namminneq paasissutissanik pissarsiniarunik pisortanut saaffiginniinnarsinnaasut, naalakkersuisut siulittaasuat Hans Enoksen erseqqissaavoq.
Allattoq Louise M. Kleemann
maajip 09-at 2008 07:33

Namminersorneq pillugu innuttaasut taasitinneqarnissaat novembarip 25-ianni pissasoq naalakkersuisut siunnersuutigaat.

- Isumaliutissiissut annertoorujussuuvoq, taamaammat aamma pingaaruteqartorujussuuvoq innuttaasut pitsaasumik paasissutissanik tuniorarnissaat, Hans Enoksen oqarpoq.

Naalakkersuisuni, inatsisartuni aammalu partiini, kommunit suleqatigalugit paasisitsiniaanerit inoqarfiit sapinngisamik tamaasa tikillugit ingerlanneqassasoq pilersaarutigaat.

- Taassuma saniatigut tv-kkut radiokkut aviisitigut aammalu inoqatigiinnut paasissutissanik agguaassisoqassaaq, neriuppungalu innuttaasut tassani annertuumik peqataalluassasut, Hans Enoksen oqarpoq.

Hans Enoksenip erseqqissaatigaa innuttaasut paasissutissanik amigartunik tunineqarsorisut, namminneq oqartussanut saaffiginnittarsinnaasut.

- Kommunit allanngortiterneranni ilaatigut oqaatigineqartarpoq "paasissutissanik pissarsinngitsoorpugut", kisianni piginnaatitaaffik kisimi ujartorneqarsinnaanngilaq, aamma innuttaasut akisussaaffeqartariaqarput. Taamaammat tassani aamma pisussaaffigivaat paasissutissanik namminneq pissarsisimanngikkunik pisortanut saaffiginnillutik pissarsiniarnissartik.

Hans Enoksenip naatsorsuutigaa sinerissamut paasisitsiniaanerit ukiaru aallartissinnaassasut.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq