Hans Enoksen: Innuttaasut paasissutissamik pissarsinissartik akisussaaqataaffigaat
Namminersorneq pillugu innuttaasut taasitinneqarnissaat novembarip 25-ianni pissasoq naalakkersuisut siunnersuutigaat.
- Isumaliutissiissut annertoorujussuuvoq, taamaammat aamma pingaaruteqartorujussuuvoq innuttaasut pitsaasumik paasissutissanik tuniorarnissaat, Hans Enoksen oqarpoq.
Naalakkersuisuni, inatsisartuni aammalu partiini, kommunit suleqatigalugit paasisitsiniaanerit inoqarfiit sapinngisamik tamaasa tikillugit ingerlanneqassasoq pilersaarutigaat.
- Taassuma saniatigut tv-kkut radiokkut aviisitigut aammalu inoqatigiinnut paasissutissanik agguaassisoqassaaq, neriuppungalu innuttaasut tassani annertuumik peqataalluassasut, Hans Enoksen oqarpoq.
Hans Enoksenip erseqqissaatigaa innuttaasut paasissutissanik amigartunik tunineqarsorisut, namminneq oqartussanut saaffiginnittarsinnaasut.
- Kommunit allanngortiterneranni ilaatigut oqaatigineqartarpoq "paasissutissanik pissarsinngitsoorpugut", kisianni piginnaatitaaffik kisimi ujartorneqarsinnaanngilaq, aamma innuttaasut akisussaaffeqartariaqarput. Taamaammat tassani aamma pisussaaffigivaat paasissutissanik namminneq pissarsisimanngikkunik pisortanut saaffiginnillutik pissarsiniarnissartik.
Hans Enoksenip naatsorsuutigaa sinerissamut paasisitsiniaanerit ukiaru aallartissinnaassasut.
