Inatsisartunut ilaasortaq, Palle Christiansen, Demokraatineersoq, naalakkersuisut siulittaasuannit Hans Enoksenimit tallimanngormat allagarsivoq.
Palle Christiansen Siumup nuna tamakkerlugu Sisimiuni ukioq manna februaarimi ataatsimiinneranut atatillugu ilassinninneq pillugu septemberip ulluisa 27-ianni allakkatigut apeqquteqarpoq, Naalakkersuisut naalagaaffiulluunniit ataani aningaasanik ilassinnissutissatut immikkoortitanik Naalakkersuisut siulittaasuat aningaasartuuteqarsimanersoq paasiniarlugu.
Hans Enoksen-ip ersarissumik ilisimatitsissutigaa Siumup nuna tamakkerlugu upernaaq ataatsimiinnerani Naalakkersuisut ilassinninnermut konto-atigut imaluunniit pisortani ilassinninnermut konto-kkut allakkut ilassinninnermut aningaasartuuteqartussanngortitsisimanani.
Naalakkersuisut siulittaasuata akissutaa Palle Christiansenip tusaatissatut tiguaa.
- Hans Enoksen ataatsimiinnermi aningaasartuuteqartussanngortitsisimanani oqaruni, tamanna ilumoorsimassaaq, Palle Christiansen Radioaviisimut ullaaq manna oqarpoq.
Siumup nuna tamakkerlugu ataatsimeersuarnerani tassanerpiaq naalakkersuisunut ilaasortaq Jørgen Wæver Johansen ilassinninnermut aningaasartuutissaminik atuivallaarsimasutut isornartorsiorneqarpoq.
