Inuit innarluutillit illersuisuat illoqarfinnut nunaqarfinnullu angalalerpoq
Innarluutillit inuunerinut atugassarititaasut misissorniarlugit inuit innarluutillit illersuisoqarfiat Tilioq perngarluni angalasussanngorpoq.
Illoqarfinni tamani nunaqarfinnilu marlussunni innarluutilinnut atugassarititaasut misissorlugit aggustip 10-niit 23-anut angalanermini inuit innarluutillit illersuisuat siullermik Kommune Kujallermukassaaq.
Narsaq: aggustip 10.-niit 13.-anut
Alluitsup Paa: aggustip 13.-a
Narsarmijit: aggustip 14.-a
Nanortalik: aggustip 15.-aniit 17.-anut
Qaqortoq: aggustip 17.-aniit 21.-anut
Kommunimi ataatsimi innarluutillit inuunerini atugassarititaasut nalilerniarlugit kommune tamakkerlugu siullerpaamik Tilioq angalaassaaq.
Tilioq assigiinngitsunik sammisaqarfiusunik aaqqissuussaqarniarpoq, aammalu innarluutillit ataasiakkaarlutik inuit innarluutillit illersuisuat oqaloqatigisarsinnaavaat.
Tilioq sinnerlugu Kommune Kujallermi angalaneq nalunaarusiornermik malitseqassaaq, tassanilu innarluutilinnut atugassarititaasut pillugit Naalagaaffiit Peqatigiivisa Innarluutillit pillugit Isumaqatigiissutaat tunngavigalugu paasissutissiissaaq kiisalu oqartussasut siunnersorlugit.
AAMMA ATUARUK Ikiorneqarluarumalluta Danmarkimut nuuppugut
Inunnut innarluutilinnut ikiuutaasunik naammanngitsumik neqerooruteqarneq pillugu Kalaallit Nunaat ukioq manna siusinnerusukkut Institut for Menneskerettigheder-imit (Inuit pisinnaatitaaffii pillugit suleqatigiiffimmit) isornartorsiorneqarpoq. Nunaminni ikiorneqarlutillu tapersersorneqarsinnaanerat naammanngilaq, taamaattumillu tamanna pillugu nunartik qimattariaqartarpaat, nalunaarusiami allassimavoq.
Nalunaarusiami aamma Institut for Menneskerettigheder-imit tikkuarneqarpoq susassaqarfiit akimorlugit suleqatigiinneq annikeqisoq kiisalu politikkikkut, sullissinikkut inatsisiliornikkullu innarluuteqarneq sammineqanngippallaartoq.