Vittus: Asiami niuernikkut isumaqatigiissuteqarneq avammut niuernermut iluaqutaassaaq

EU-mut aporfeqannginnerusumik niueqatigiinnissamik inissisimanitsinnut sunniuteqassaaq, tamannalu isumakulunnarpoq.

Niueqatigiinnissamimmi isumaqatigiissutip kingunerisaanik canadamiut nioqqutissaataat EU-mut eqqunneqaraangamik akitsuutaat appartinneqartassapput.

Kalaallit Nunaata aalisakkanik tunisassiaanik Europamut tuniniaaneranut ulorianartorsiortitsisinnaavoq.

Taamaattumik Sulisitsisut Peqatigiiffiata Royal Greenlandillu pisortaasa naalakkersuisut kajumissaarpaat tullianik EU-mut isumaqatigiinnialerunik ajunngitsorsiassanik piumasaqaqqullugit.

Piareersaasoqartoq Vittus Qujaukitsoq oqarpoq.

- Soorunami tamakku eqqarsaatitsinniipput, naalakkersuisoq oqarpoq nassuerutigaluguli oqitsuunavianngitsoq:

- Unammillersinnaanitsinnik ungasinnerusoq isigalugu sanngiillisaanerussaaq, tamannalu qisuariarfigisariaqarparput, oqarsinnaanngilangali qanoq ililluta, imaassinnaavorli maanna inissisimaffitta ingerlatiinnarnissaa piumasarigipput.

Paarlattuanik Kalaallit Nunaat EU'p piginngisaanik periarfissaqarpoq, tassalu Kalaallit Nunaat piumasaminik nunanut assigiinngitsunut niueqatigiinnerup aporfeqannginnerunissaanik isumaqatigiinniarsinnaammat.

Kangia ungalleq soqutiginaateqartoq Vittus Qujaukitsoq oqarpoq:

Niuerfinnut assigiinngitsunut soorlu Kangianut ungallermut periarfissarsiorpugut, siunissami periarfissatut suliniutigisinnaallugu unammillerlutalu.

Vittus Qujaukittulli Canadap EU-llu isumaqatigiinniarnerata kinguneranik Kalaallit Nunaata EU-mut ilaasortanngoqqissinnaanera itigartilluinnarpaa.