Assi: KNR

Hammondip Nunatta karsianit atugai amerlanerupput

Aleqa Hammondip Nunatta karsianit atorsimasai 106 000 koruuniinnaasimanngitsut, Inatsisartut kukkunersiuinermut ataatsimiisitaliaata ilisimatitsissutaani atuarneqarsinnaasoq, ataatsimiititaliap siulittaasua Randi Vestergaard Evaldsen nassuiaavoq.

- Ilisimatitsissut 2015-ip aallartinnerani nassiunnikuuarput. Aleqa Hammondip aningaasat atorsimasai katinneqarpata 204.000 koruunit missaanni inerneqartussaavoq, Randi Vestergaard Evaldsen oqarpoq.

Aleqa Hammondip Nunatta karsianit atorsimasai saqqummiunneqareersunit 98.000 koruuninik taamaasillutik amerlanerupput, aningaasallu Parisimut Islandimullu sulinngiffimmi angalanernut ilaatigut atorneqarsimallutik.

Tamannalu maleruagassanik unioqqutitsinerusoq Evaldsen oqarpoq.

- Soorunalimi inatsisini allaqqavoq, uku aningaasat privatimik atorneqaqqusaanngitsut. Soorunalimi taamaasilluni unioqqutitsinertut taaneqarsinnaavoq.

Aamma atuaruk VIDEO Aleqa Hammondip qinigassanngortinnera Siumumi avissaartuussutavoq

Kukkunersiuisartut Deloitte 2014-imi Namminersorlutik Oqartussanut saaffiginnimmata, Aleqa Hammondip Nunatta karsianut akiligassai 204.000 koruuniugaluartuni 98.000 koruunit akilereersimammagit 106.000 koruunimut ikilisimapput.

106.000 koruunillu tassaapput saqqummiunneqartut.

Aleqa Hammondili Nunatta karsianit atorsimasuni kisimiinngilaq.

 

Kisimiinngilaq

Aleqa Hammondip Naalakkersuisut siulittaasuattut siulia, Kuupik Kleist Deloitte kukkunersiunermut ataatsimiititaliamut saaffiginnimmat 20.288 koruuninik akiligassaqarpoq.

Aningaasalli Nunatta karsianit atorsimasai katillugit 45.322 koruuniupput, aningaasallu taakkunga akilerneqarnissaat pillugu suliaq akiliisitsiniartartumut suliassanngortinneqarsimavoq.

Aamma atuaruk Aleqap naalakkersuisuusimasut atornerluisimanersut paaserusukkaa

Aleqa Hammondip akiligassani akilersimagai kukkunersiuinermut ataatsimiisitaliamit aamma oqaatigineqarpoq.

Taamaaliornermigulli iluutsini aaqqinngikkai, Randi Vestergaard Evalsen isumaqarpoq.

- Taamannak Nunatta karsianit bankitut atorfigalugu tunngaviatigut pissusissamisuunngilaq. Nunatta karsia kassekredititut atugassiaanngilaq, Randi Vestergaard Evaldsen oqarpoq.

Taanna Aleqa Hammondituulli folketingimut ilisimaneqartutut qinigassanngortippoq. Kisianni matumunngarpiaq tunngatillugu kukkunersiuinermut ataatsimiisitaliaq sinnerlugu oqaaseqarluni Randi Vestergaard Evaldsenip erseqqissarpaa.

Radioaviisi Naalakkersuisut siulittaasuata naalakkersuisoqarfianit oqaaseqartitsiniaraluarpoq, tassanngaanniilli kukkunersiuinermut ataatsimiisitaliap ilisimatitsissutaanut innersuunneqarpoq.

KNR-ip Aleqa Hammond aamma oqaaseqartinniaraluarpaa, suliarli pillugu oqaaseqarusunnani nalunaarpoq, akiligassanilu akilereerlugit erseqqissarlugu.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat