Aleqap naalakkersuisuusimasut atornerluisimanersut paaserusukkaa
Ippassaq tupaallaataaqisumik naalakkersuisut sisamat tunuarput. Tunuartoqarneratalu kingorna Atassut naalakkersuisooqatigiinni suleqataajunnaarnertik nalunaarutigaat. Politikerillu akornanni uisakajaarneq allartippoq. Aleqa Hammondillu naalakkersuisutut tunuartut apersorneqarneri arajutsisoorsimagunarpaa, kingornami ima allappoq:
- Soormita tunuarrattut toqqaannartumik aperineqanngillat akiliunneqarnikuusimanersut, tamavimmik - aamma naalakkersuisuunikut.
Tunuartut atornerluisimanersut aperineqartut
Naalakkersuisuniilli tunuartut tusagassiortunik katersortitsinerminni toqqaannartumik TV-kut apersorneqarnerminni akileraartartut aningaasaataannik atornerluisimanersut aperineqarput, tamarmillu akinissaminnut periarfissinneqarlutik.
Jens Erik Kirkegaard aamma Nick Nielsen aningaasanik atornerluisimanatik oqaatigaat.
- Imatut oqaatigilara; uanga akiligassamik nassitsinnikuunngilanga,Inuussutissarsiornermut Aatsitassanullu naalakkersuisuusimasoq Jens Erik Kirkegaard akivoq.
Nick Nielseni akiligassitsinnikuusimanani aamma oqaatigaa.
Atassummeersoq Siverth K. Heilmann aningaasanik atornerluisimanani sapinngisamillu akikinnerpaamik angalasarluni nassuiaavoq. Parteeqataatali apeqqut akisinnaanngilaa.
Steen Lynge, Peqqissutsimut Attaveqatigiinnermullu naalakkersuisutut tunuartoq, Kukkunersiuinermut Ataatsimiitsitaliap misissuinera naammassitinnagu oqaaseqarumanngilaq.
