Halibut Greenland sinneqartoorpoq
Qaleralinnik tunisassiortut Ilulissani umiarsualiviup kangerliumarngani Kangerluatsiami akileriillutik inissisimapput suliffeqarfiillu taakku tamarmik 2011 anigorpaat sinneqartoorlutik.
Royal Greenland maaji aallartilaartoq suliffeqarfissuup naatsorsuutaanik 2011/2012-mut saqqummiussivoq tassanilu 71 millioner koruuninik sinneqartoorpoq, taamaattoq Ilulissani suliffissuarmut naatsorsuutit immikkut saqqummiunneqanngillat.
Maanna Ilulissani unammillertaata Halibut Greenlandip 2011-mut naatsorsuutini saqqummiuppai tassanilu 8,8 millioner koruuninik sinneqartoorput. Kangerluatsiap akiani unammillertiminit suliffeqarfissuarmit sinneqartoorutini ikinnerugaluartut taamaattoq angusai siulersuisut naammagisimaarpaat.
- Siulersuisut nuannaarutigaat annermik aalisartut Halibut Greenland ApS-imik pilersitsisimanermikkut aalisartut ilaqutaasalu atugaasa siuarsarneranni siulersortaaqataagamik. Siulersuisut maluginiarluarpaat Qeqertarsuup Tunuani unammilleqatigiivittoqarneratigut aalisartut aningaasarsiorluarnerat nunatta sinnerani aalisartut akornanni maluginiarneqarsimasoq kissaatigineqarlunilu, Halibut Greenlandip siulersuisui nalunaarput.
Halibut Greenlandimik piginneqataasut amerlanerit tassaapput Ilulissani aalisartut suliffeqarfiup pilersinneratigut tunisinermi akit qaffasinnerulernissaannik anguniagallit. Greenland Venture piginneqataassutit 37 procentit missaliorlugit pigisaqarpoq.
