Halibut Greenland Namminersorlutik Oqartussanut naammagittaalliuteqarpoq

Halibut Greenlandip umiarsuarsuaa tunitsivik Rubin Upernaviup eqqaani qaleralinnik akigissaartitsilluni tunitsiviunermini aalassatsitsivoq. Tassani Upernavik Seafoodip nunami tunitsiviutini 200-nik sulisoqartut matuai, aatsaallu umiarsuaq tunitsivik Rubin Ilulissanut kujavartermat tunitsiviit nunamiittut ammarneqaqqipput. Rubin Ilulissat eqqaani aamma tunitsivigineqarsinnaasutut akuersissummik pigisaqarluni kujavarterpoq.

Ilulissat eqqaanilu Rubinip tunitsiviunerani aamma aalassatsitsisoqarpoq. Tassani Qasigiannguani Royal Greenlandimi fabrikkimi sulisut 80-it qaleralinnik suliassaarutsinneqarlutik suliunnaarsikkallarneqarmata.

Halibut Greenlandip killissaa maanna qaangerneqarpoq, tassami taakku Namminersorlutik oqartussanut naammagittaalliuuteqarlutik augustip pingajuani allagaqarput. Naammagittaalliornermi Upernaviup eqqaani pisut tunngavigineqarput.

Halibut Greenland Upernaviup eqqaani qaleralinnik 1.000 tonsinik kiisalu Ilulissat eqqaani qaleralinnik 800 tonsinik usilersorsinnaanermut aalisarnermut aqutsisoqarfimmit akuersissumik maajip 18-iani tunineqarput.

Ilulissat eqqaani tunitsivimmik umiarsualiinissamut atatillugu killilersuisoqanngilaq, taamaattoq Upernaviup eqqaani "aalisarfinni nutaani" tunitsiviliisinnaanermik akuerisaapput, Halibut Greenlandilu naapertorlugu killiliunneqartoq uaniippoq, tassa umiarsuaq Upernaviup eqqaani Upernavik Seafoodip nunami tunitsiviisa eqqaani tunitsiviusssanngimmat. Tamannalu Halibut Greenlandimit malinneqaraluartoq, suliffeqarfimmit oqaatigineqarpoq.

Aqutsisoqarfimmit kingorna Halibut Greenlandip akuerisaaffii marloriaq allannguiffigineqarput.

- Allannguutit iluamik tunngavilersungaanngillat atorsinnaanatillu, Halibut Greenlandimit tusagassiutinut nalunaarummi allaqqasoqarpoq. Halibut Greenlandip aalisarnermut aqutsisoqarfik piumasaqarfigaat suliaq pillugu nalilersueqqissasut. Tassanilu Aqutsisoqarfimmit suliffeqarfiup piffinni aalajangersimasuni tunitsiviusinnaaneranut kiisalu suliareqqiisinnaaneranut akuersineq nalunaarutigissagaat, piumasaqaallu malinneqanngippat Halibut Greenlandimit taarsiivigitinnissamut suliakkiussisoqassaaq.