Halibut Greenland: Ipitinniarneqarnersugununa?
Tunisassiorfimmilu Halibut Greenlandimi pisortap Niels Thomsenip Royal Greenland maanna sakkortuumik isornartorsiorpaa.
Royal Greenlandimi Nunatsinni arlalinnik tunisassiorfeqarpoq, Halibut Greenlandilu Ilulissani kisimi tunisassiorfeqarluni. Niels Thomsenillu tikkuarpaa, Royal Greenlandip Nunatsinni sumiiffinni arlalinni kisermaassivinnini iluanaaruteqaatigisaraa.
- Nunatta ilaani qaleralinnik qalluiffimmi iluanaarut pilersinneqartartoq, maani Ilulissani imaluunniit Qeqertarsuup tunuani atorneqarpoq. Uagut namminersortut ipitinniarsaraluta. Halibut Greenlandip pisortaa oqarpoq.
Piginneqatigiiffimmi tassani piginneqataassutit ilaat aalisartunit ilaallu allat pisortanit pigineqartumit Greenland Venturemit pigineqarput.
Royal Greenlandimili pisortap, Michael Tinghuusip tamanna ilisarisinnaanngilaa:
- Unammillinngilagut ingiaaniarsaraluta, unammillerpugulli Qasigiannguani sulisugut 130-it qaleralinnik suliassaqartikkusullugit, Royal Greenlandip pisortaa Michael Tinghuus oqarpoq.
Halibut Greenlandilli Qeqertarsuup Tunuani, qalerallit pillugit unammeqatigiinneq torerpallaannginnerarpaa.
- Unammillernerup ilusaa torerpallaanngitsutut nalilerparput, ilaatigut akinik nalimmassaalluta pissusilersortilluta sippungaatsiarluta qaangerniarneqartuaannarpugut. Unammiuminaatsumik akinik inissiisoqarpoq, taanna niuernermik tunngaveqarsorinngilarput aamma, Halibut Greenlandip pisortaa, Niels Thomsen oqarpoq.
Tassungalu tunngatillugu Royal Greenland pisortanik pigineqartup pisortaa, ima oqarpoq:
- Ilaatigooriarluni Halibut Greenlandip akit qaffattarpaat, taava aamma uagut qaffaagaangatta taakku qaffaasarput.
Tamannali Niels Thomsenip ilumuunnginnerarpaa, oqarluni unammillertimik qanoq akeqartitsinerannik tusarlerneqaraangamik, taakkua qanillattorniartaritik, kisianni qaanngernikuunagit.
Michael Tinghuusillu oqaatigaa, unammilleqatigiinneq soorunami ilungersunartuusoq.
- Coca Colaalluni Pepsi Colaallunilu unammineq ilungersunartuuvoq, uanili pineqartumi unammillerneq aalisartunut iluaqutaavoq. Qaleralittaminnummi akinik pitsaanerusunik pipput. Royal Greenlandimi pisortaq, Michael Tinghuus oqarpoq.
Halibut Greenlandip pisortaata Niels Thomsenip naqissuserpaa, unammilleqatigiinneq apeqqusernagu. Taamaattorli piumasaarinnarpaa unammilleqatigiit assigiimmik periarfissaqarnissaat.
