Qinersisoqannginnerani oqallinneq sakkortooq
USA-p naalagaaffiata Nevadap illoqarfiani Las Vegasimi oqallipput.
Qineqqusaartullu oqallinnerup aallartinnerani pissuserissaarput. Tamannali allanngorpoq.
Trumpip vicepræsidentissamisut piukkussaa, Mike Pence, qinersinerup inernera ataqqissallugu oqaraluartoq, qinersinermi pissusissamisuunngitsuliortoqarsimaneranik oqaatigisariikkani Trumpip uteqqippaa.
- Hillary Clinton qineqqusaarsinnaanngisaannartussaassagaluarpoq. Pinerluttuuvoq, Trump oqalliffimmit oqarpoq.
Qinersinerullu inerneranut ataqqinnissanerluni aperineqarami Trump ima akivoq.
- Qinersinerup unnuaani paasinarsiumaarpoq.
Aamma pisoorsuup unammillertini Hillary Clinton "a nasty woman"-imik - kalaallisut nutserlugu arnaqquassaamik taavaa.
Sakkunik peqarsinnaanermut inatsit nunasiortarnerlu aamma oqallisigineqarput. Trumpillu Mexicop USA-llu akornanni qarmarsualiortitsiniarluni neriorsuutigeqqippaa.
CNN-illi inuit isumaannik paasiniaanera naapertorlugu Hillary Clinton saqqummiussilluarneruvoq.
Paasiniaanermi aperineqartut 52 procentii Clinton ajugaasutut toqqarpaat, 39 procentiilu Trump ajugaasutut toqqarlugu.
USA-mi præsidentimut novembarip ulluisa arfineq-pingajuanni qinersisoqassaaq.
/ritzau/