GUX Nuup timersoqatigiiffiillu timersornermik ilinniagaq nutaaq suleqatigiissutigigaat
Ilinniagaq nutaaq ukiormanna aallartittussaq ilinniartunut 24-nut inissaqarpoq, taakkulu 2019-imi soraarummeertussaassapput peqatigisaanillu timersornermut tunngasunik annertuumik ilisimasaqalissallutik nunallu tamalaat akornanni timersornikkut qaffasissutsimut angummassinnaassallutik.
- Taamatut aaqqissuussinikkut inuusuttut ilinniaatigalutik timersornerup iluani angusarnissaannut periarfississavagut. Aammattaaq Nunatsinni timersornikkut immikkut piginnaasalinnut tunngatillugu sungiusariaaseqarneq nukittorsaavigineqarsinnaassaaq, Kalaallit Nunaanni Timersoqatigiit Kattuffianni Generalsekretæri Carsten Olsen taama oqarpoq.
Kalaallit Nunaanni Timersoqatigiit Kattuffianni sinniisutut aallartitat Elite Sport Greenland aamma GUX Nuuk suleqatigiillutik suliniut aallartippaat. Ilinniarnerup peqatigisaanik siammasissumik timersornermik sammineqarnissaq pineqarpoq, peqatigitillugu immikkut piginnaasallit akunnerminni ataqatigiinnerannik nukittuumik ineriartortitsiffiussalluni.
- Aallartinnissarput qilanaaraarput soorluttaaq ilinniartitaanerup ilusissaa aaqqissuullugu aallartereersugut, taanna GUX nalinginnaasoq assigalugu qaffasinnerusumik ilinniaqqinnissamut isissutaasinnaavoq, GUX Nuup rektoria Mikael Enggaard, timersornermik ilinniagarnissamut qinnuteqartoqarluarnissaannik neriulluartoq taama oqarpoq.
Kikkulluunniit ilinniakkamut tassunga qinnuteqarsinnaapput, taamaattoq qinnuteqartut tamarmik akuerineqarnissartik ilimagissanngilaat, piumassuseq annertooq pigineqartariaqarmat soorluttaaq timersuummi aallutami annertuumik pikkorisserusunnermik pigisaqartariaqartoq, rektori erseqqissaavoq.
Ilinniarnertuunngorniarfimmi ilinniakkamut qinnuteqarfissaq kingulleq tassaavoq marsip aallaqqaataa, Piareersarfillu aqqutigalugu qinnuteqartoqassaaq. Timersornermik ilinniagaq nutaaq pillugu paasissutissat amerlanerusut nittartakkami www.gu-nuuk.gl-imi atuarneqarsinnaapput.
