Guvernørit: Kyiv-ip avannaani russit nuna qimagarpaat

Russit sakkutuuisa nunap ilaanit Kyiv-ip avannaatungaaniittunit illoqarfiullu Tjernihiv-ip avannaata kangisissuaniittunit tunuareerput imaluunniit tunuartiterlutik.

Tallimanngornermi ullaap tungaani guvernørit taama nalunaaruteqarput.

Nunap ilai Kyiv-ip avannaatungaanittut qimagarneqalerput. Suli avannarpasinnerusumi russit sakkutuui  Hviderusland-ip tungaanut ingerlaarput.

Sumiiffimmi Oleksandr Pavljuk inuit attaveqaqatigiittarfianni Tegram-ini taama nalunaarpoq.

- Russit qamuterpassui assigiinngitsunik angissusillit tulleriiaarlutik ingerlaartut takusinnaavavut, allappoq.

Nunap ilaa qimavinneqanngilaq 

Nangilluni nalunaarpoq russit sakkutuuisa illoqarfeeraq Hostomel qimassimagaat. Mittarfeqarfiup sakkutooqarnikkut pingaaruteqartup saniani inissisimavoq.  

Akerlianilli russit illoqarfimmi Kyivip avannamut kangianittumi Bucha-mi illersorfissalerlutik inissipput.

Reuters allanik tigusiffeqanngilaq tamatuminnga ilumoorneraasinnaasunik.

Nunap ilaani tassani guvernøri Tjernihiv-imik akisussaaffiginnittoq oqarpoq russit sakkutuui tunuariartortut, kisianni nunap ilaa suli qimavinnagu.  

- Nunap ilaani silaannarmiit aamma rakettinik saassussinerit suli pisinnaapput. Kialuunniit tamanna mattutinngilaa, Vjatjeslav Tjaus oqarpoq.

Kisianni guvernørip ilumoornerarpaa ukrainemiut sakkutuui nunap ilaanut immikkoortunut isaalersut russillu qimatsinerisa kingorna isumannaarlugit.

Tjernihiv sapaatip akunnerini arlalinni sakkortuumik sorsussiuvoq qaartartumeerneqartarlunilu. Pingasunngormat illoqarfiup niuffaffia rakettinit eqqorneqarnermigut sequminneqarpoq.