GUmik sananissaq kommunip taperserpaa
Iluliarmiut akornanni isumaqatigiissutaavoq illoqarfik ima angitigilersimasoq namminerisaminik ilinniarnertuunngorniarfeqalersinnaalluni. GU-liornissamik piumasaqarnermi ilaatigut siunnersuutigineqarpoq timersornermik sammisaqarfiusumik GU-liortoqarsinnaasoq. Ilulissani GUliornissamik piumasaqarneq Qaasuitsup kommuniata aamma taperserpaa.
- Assorujussuaq nuannaarutigaara noqqaaneq innuttaasut namminneq saqqummiummassuk. Taamaasilluni kommuni nukissamik tunineqarpoq suliap ingerlateqqinnissaanut. Soorunami Qaasuitsup kommunianit tapersersorparput Ilulissani GU-qalernissaa, taama KNRimut oqarpoq Qaasuitsup kommuniani borgmesteri Jess Svane.
Pingasunngornermi unnukkut innuttaasunik ataatsimiisitsisoqarmat kommuni, Inunnik Isumaginninnermi Ilinniarfik aamma Piareersarfik saqqummiusseqataapput. Tamatuma kingorna eqimattat oqallisereermata malunnarsivoq suliniut tapersersorluarneqartoq.
- Maanna aallartittoq assersuunneqarsinnaavoq Qasigiannguani efterskoleqalernissaanut suliniutip aallartinneranut. Taamanikkummi nunaqqatigiit ataatsimoorlutik saqqummiussuipput illoqarfiup neqeroorutigisinnaasaanik, taama Jess Svane oqarpoq.
- Maanna Ilulissani taamatut pisoqarpoq inuttaasut illoqarfiup neqeroorutigisinnaasai saqqummiussormatigit, taama Jess Svane oqarpoq.
Suliniummik aallartitseqataasoq Lene Ravn Davidsen KNRimut oqaluttuarpoq siunnersuutit ilagigaat timersornermik sammisaqarfiusumik GU-liortoqarsinnaasoq Ilulissat timersornikkut qangaaniilli ingerlatsiffiulluarmat.
Pingasunngornermi ataatsimiinnermi eqimattat saqqummiussaat maanna allattorneqarput kommunimiit Namminersorlutik Oqartussanut saqqummiunneqarumaarlutik.
- Ilulissani GU-liornissaq kollegialiornermik annertuumik malitseqassasoq ilimaginngilarput Avannaani Ilinniarnertuunngorniarfimmi Aasianni ilinnialersartut amerlasuut llulissaneersuusarmata, taama Jess Svane oqarpoq.
Pingasunngornermi ataatsimiinnermi erserpoq ukiormanna GU-mi aallartinniarlutik Ilulissaniit qinnuteqartut 60-it sinneqartut.