Guld-44
Unammineq sivitsoriarlugu 14-riarlunilu straffeqattaarneqareersoq G-44 Qeqertarsuarmeersoq 2011-mi pissartatut imminnut taasinnaalerput. Pisoq nuannaarutigalugu klubbip illersuisuisa klubbertik taagulersimavaat Guld-44 naak Godhavn 1944-mit naalisagaangaluartoq.
B-67 1-0-mik siuaqqaaraluarpoq unamminermulli piffissaliussaq naajartulersoq G-44 isertitsivoq aammalu unammineq naammassilivissoq G-44-rmiut ilaat anisitaammat arsaattui quliinnanngorlutik. Unammineq minutsit 15-it marloriarlugit sivitsorneqaraluarmat isertitsisoqanngilaq.
Straffeqattaarnermit iligiit tamarmik tallimariarlutik isertitseriartussanngorput. G-44 målinik marlunnik kinguaraluarpoq taamalu B-67 ajugaassutaasunik marloriarluni isertitsisimasinnaagaluarluni. Iluatsinngilaalli. Taamaasimmat tamarmik ataasiarlutik isertitseriaqattaartussanngorput ajugaasussarsinissamik tungaanut. G-44 iluatsitsineruvoq taamarlu 7-6-mik ajugaalluni.
T-44 Aasianneersoq bronze-nnanniunnermi 3-1-mik ajugaavoq K-33 Qaqortumeersoq ajugaaffigalugu. Taamaasilluni Aasiammiut timersoqatigiiffiat ukiormanna ukiunik 70-nngortorsiortoq nalliuttorsiornermini tunissutisilluarpoq.