GU-mi ilinniartut napparsimanertik pissutigalugu ilinniarnersiutitik annaasinnaavaat

21-nik ukiulik Nini Tessing Radioaviisimi sapaatit akunneranni kingullermi oqaluttuarnitsitut, aammigut kræfternerminik katsorsarneqaraluarluni, angusarissaaqaluni ilinniarnertuungorniarfimmi misilitsittoq, taama ilisimatitsunermut tunngaviuvoq.

Nini Tessingilli kalaallit peqqissartut illuanni Københavnimiittumi nammineerluni ilinniartutut misilitsinnissani pilersaarutit eqqorlugit naammassisimagaluarlugit , napparsimanermigut ilinniagaqarnersiuteqannginermigut koruunit 1000-ilikkaat pissarsiarinngitsoorpai.

Nini Tessingimmi napparsimanini peqqutigalugu ilinniarfimmi malinnaasinnaajunnaarmat, ilinniagaqarnersiutaanik arsaarneqarpoq.

- Pakatseqaanga. Aallaqqaammut eqqarsarpunga, qanoq iliorfissaqanngitsoq. Kisianni isumaliorpunga taamaattoqarsinnaanngitsoq. Misilitsinnissamummi suli allatseqqavunga. atuaqatimmalu ilisimaligaasa assigannik ilisimasaqartariaqarlunga. Atuartuusiinnarpunami, naak atuarfiliartanngikkaluarlunga. Taamaammat atuaqatittulli tapisiaqarsinaannginnama, naapertuutinngittutut isigaara.

Ilinniagaqarnersiuteqartitsivimmi pisortaq, Ilannguaq Nielsen, KNR-imiit oqaloqatigaarput immiunneqarumanngilarli. Aperaarpulli, sooq Nini Tessing aammigut kræftimut katsorsarneqarnermini ilinniagarnersiuteqartinneqannginnersoq? 

Radioavisimullu ilisimatitsivoq, Ilinniagaqarnersiuteqartitsiviup malittarisassat imannak paasigai, atuartitsisineq takkuffiusussaasoq peqataaffigisinnaangikkaanni, ilinniagaqarnersiutisisoqarsinnaanngitsoq. Tassa. Aamma taamaappoq, ilinniartoq ilinniarnerminik nammineerluni ingerlatsigaluarpalluunnit.

Namminersorlutik Oqartussat ilinniarnersiuteqartitsineq pillugu nalunaarutaat naapertorlugu ilinniartut ilinniarnersiuteqartilluni napparsimaneq peqqutigalugu ilinniarnerminik kinguartoorsimaguni, ukiumi ataatsimi suli ilinniarnersiuteqarsinnaasoq.

Kisianni Ilannguaq Nielsen naapertorlugu Ilinniagaqarnersiuteqartitsivimmit paragrafi taanna ima paasisarpaat, ilinniartoq ima peqqitsigileruni atuariartoqqissinnaanngorluni, taava aatsaat  iliniagaqarnersiutisisinnaasoq.

- Ilinniagaqarnersiuteqartitsiviuvugut. Ilinniarnermik aallussisunut ilinniagaqarnersiutisititsisarpugut. Ilinniarnerminnik aallussinngitsut ilinniarnersiutisisinnaangillat, Ilannguaq Nielsen oqarpoq.

Taamali tunngavilersuineq Nini Tessingp paasisinnaangilaa:
- Namminneerlutik ilinniartut ilinniarnerminnut namminneq akisussaasarput. Imaanngilarlu taakkua ilinniartunit atuarfimmukartartunit ilinniagasserinikinnerullutillu allanik suliakkinerusartut. Nammineq ilinniarnissaq aalajangiuppara, atuarfiliarsinnaasannginnama. Kisianni tassa aamma atuarnermut malinnaanissara misilitsinnissaralu qinerpara. Taamaammat ilinniarnersiuteqartinneqannginera naapertuutinngitsutut isigaara, Nini Tessing oqarpoq.

Ilinniagaqarnersiuteqartitsivup Københavnimilu Kalaallit Illutaata allakkatigut attaveqatigiittarneraniit pappialat KNR-p pissarsiarai. Kalaallit Illuutaat Nini Tessing sinnerlugu saaffiginnittarsimavoq. Pappialaatinilu atuarneqarsinnaavoq, Ilinniartitaanermut Naalakkersuisoqarfimmi  inatsisilerituup malittarisassat allaanerulluinnartumik paasigai.

Taanna allappoq nammineq naliliinini naperorlugu, paragrafi immikkut ittumik pinnissinnaanermut tunngasoq erseqqissumik periarfissiisoq. Ilannguaq Nielsenili naapertorlugu qanoq paasinninneq uani apeqqutaavoq, Ilinniarnersiuteqartitsivimmilu paasinninertik namminneq malissallugu qinersimagitsik.

Erseqqissarpaa, ilinniartut iliniakkaminnik aalluussinersut, ilinniarfiit namminneq nalilertusaagaat, Ilinniagaqarnersiuteqartitsiviullu taakkunani naliliinerit maliinnarai. Nini Tessingimullu atatillgu tassa Nuummi GU-mit naliliineq malinneqartoq.

Nini Tessingip Københavnimi Kalaallit Illuutaannit ikiorneqarluni Ilinniagaqarnersiuteqartitsivik kimippaa, misilitsinermini qaammatini marlunni ilinniagaqanersiuteqartusanngorluni. Kisianni februaari tamangajaat, marsimi apriilimilu ilinniagaqarnersiuteqannginnami, katillugit 12.000 koruunit annaavai.