GTE: Pilluaritsi Arctic Umiaq Line nunarpullu

Arctic Umiaq Linep neqeroorutai takornariaqarmut pingaaruteqaqisut pisortaaneq Anders Stenbakken oqarpoq:

- Siullermik Arctic Umiaq Line, Kalaallit Nunaat takornariaqarnerlu pilluaqqujumavakka. Takornariaqarneq eqqarsaatigalugu isumaqarpunga, suliniut pingaaruteqarlunilu pitsaasuusoq, Anders Stenbakken oqarpoq.

Taanna isumaqarpoq, Arctic Umiaq Linep ataannarnissaa takornariartitsinermut pingaaruteqartoq,. ilaatigut nunatsinni najugaqartut misigisaqaqaqatigalugit nunarput allaanerusumik takusarmassuk:

- Arctic Umiaq Line aqqutigalugu takornariaqartitsineq pingaaruteqarpoq, takornariammi timmisartumik Nunatsinnukartarput, sinersortaammullu ilaallutik Nunarput takornariartarlugu. Takornariat ukiumut 3.000-it missaat Nunatsinnut timmisartoriarlutik sinersortaammut ilaasarput.

Taassuma saniatigut akunnittarfiit aamma atorluarneqartarput. Takornariallu illoqarfinni ataasiakkaani sivisunerusumik uninngagaangamik periarfissanik allanik ujartuisarput, tassani takornariartitsinermik suliallit neqeroorutaannik aamma atuisarlutik. Taamaattumik Arctic Umiaq Line-ip pingaaruteqarnera qularutiginngilara, Anders Stenbakken oqarpoq.

Aamma isumaqarpoq, Arctic Umiaq Linep nunarput allaanerusumik avammut nittarsaalluaraa. Takornariat Nunarput isikkivimmiit allaanerusumiiit takusinnaammassuk.

- Nalunngilarput umiarsuarujussuarni takornariartitsisarneq siuariartupiloortoq. Arctic Umiaq Linelli umiarsuaata neqeroorutaa allaanneruvoq, uagutsinnut qaninnerusoq. Tassami takornariat maanimiunik ilaqarlutik sinersorlutik Nunarput immap nalaaniit takornariarsinnaavaat, nunamullu ikaarsinnaallutik, GTE-p pisortaanera, Anders Stenbakken, oqarpoq.

Arctic Umiaq Linep pisortaanera, Jette Larsen oqarpoq, takornariat ukiumut 3.000-it missaat umiarsuarmik angalanissamut angalatitseqatigiiffitsigut inniminniisartut.

Takornariat namminneerlutik kisimiillutillu angalasut Arctic Umiaq Line-ip umiarsuaataani qassit ilaasarnersut kisitsisaatigineqanngillat.